Martxan dira Hernaniko Gazte Olinpiadak. Atzo hasi ziren, eta bi proba burutu zituzten taldeek: Pintxandartea eta O faktorea. Lehiaren gainetik, ordea, jai giroa izan zen nagusi, Atsegindegin. Festan eman zuten eguna parte hartzaile guztiek, bazkari, txaranga eta kontzertuekin.
Goizean izan zuten lehenengo proba, Olinpiadei hasiera eman ziena. Pintxandartean, pintxo eta estandarte bana egin behar zuten taldeek. Janari kontuetan, Tutan Come On izan zen onena. Estandarte ederrena, berriz, Olkis & Mondejus taldeak egin zuen.
Bazkalostean, abileziak
Lehen proba amaitu ondoren, bazkaltzera joan ziren parte hartzaileak. Tripa beteta eta kafe eta kopak hartuta, lehiari ekin zioten berriro. Bigarren proba izan zuten arratsaldean: O faktorea. Helburua zen talde bakoitzak bere abileziak erakustea. Eta erakutsi zituzten, ondo erakutsi ere. Guztietan onenak, baina, Hortzak estutu taldekoak izan ziren, gimnasia erakustaldi batekin. Kronika.net webgunean ikus daiteke irabazleen saioa.
Epaileak ere ez ziren nolanahikoak izan. Taldeen lanak baloratzen aritu ziren, besteak beste: Iñaki Eguren musikaria, eta Miren Gojenola eta Mikel Laskurain aktoreak.