Bukatzen asmatzen denean, aprobetxatu egin behar. Eta ondo baino hobeto asmatu zuen, atzo, Etxeberria IVak. Aurrelari azpeitiarraren txispa eta Ionen segurtasuna oinarri, IV Sagardoaren Txapelketa irabazi zuten, Bereziartua sagardotegiaren izenean. Matxin III eta Etxeberria III Gurutzetaren ordezkariak, nahi eta ezin aritu ziren partidu osoan. Huts gehiegi egin, eta ezin izan zuten iaz lortutako txapela berriro jantzi.
Urdinek argi zuten nondik jo. «Kale edo bale zen kontua, arriskatu eta bukatzea», zioen Ionek, partidua bukatu berritan. Eta ondo atera zitzaien pentsatutakoa, Aritz Etxeberriak bikain jokatu baitzuen hasiera hasieratik: «Atera egin zaizkit lehenengoak, eta hazi egin naiz».
Hasiera, erabakigarria
Esana zuen Etxeberria III-ak, peloten aukeraketan: «Hasiera izango da klabea». Eta halaxe izan zen. Berehala hartu zuten aldea, Bereziartuako bikoteak. 0-4 hasi, eta 3-10 jarri ziren. Tanto luze bat izan zen orduan, urdinak postuz aldatzera behartu eta Aritzek huts egin zuena.
Etxeberria IV, buka eta buka
Eta tanto horretantxe, Aritz Etxeberriaren onena. Bikain erantzun, gorputza ezker-paretaren kontra, Etxeberria IIIaren sake gaiztoari. Eta dominatzen dira berriro, markagailuan bezela. Eutsi dio atzelari gorriak, eta beste behin ere bai, Ionek bidalitakoari. Baina urrutitik usaitu du pelota Aritzek. Airean egin duen parabolari begiez segi, bostgarren koadroan jarri, eta airez hartu. Pelota zestatik irten, bi paretak jo eta zabaleko sarera sartu: 4-11.
Beste bi egingo zituen, horren segidan, zabalean. Matxinen bi hutsekin, 4-15 ziren. Alde haundiegia, atzetik aurrera egiteko. Gorriek ez zuten etsi, hala ere, eta gerturatu ziren, behin edo behin: 13-18 jarri ziren, eta 31-37 ere bai, finalaren azkenetan. Baina buelta emateko aukerak oso eskasak izan ziren, partidu guztian. Ion seguru baino seguruago ibili zen, ia hutsik egin gabe; eta Aritzek, arriskatzen zuenean, tanto egiten zuen gehienetan.
Aukerarik gabe, azken ahalegina egin zuten, 34-39 hurbilduta. Baina hutsegitea edozein momentutan irits zitekeen, eta gora bota zuen Etxeberriak IIIak. 34-40, eta txapela Bereziartuaren mutilek, ondo merezita.
Lehenengo finaleko «nerbioak» ezkutuan
«Pozez txoratzen», azaldu zen Etxeberria IV, bere lehen finala irabazita: «Nerbioso xamar nengoen, baina atera zaizkit tantoak». Ion ere gustora zen, bere hainbatgarren txapela irabazita; ari baita zakua betetzen azpeitiarra. Lagunaren asko famatu zuen «Lehenengo tantoak ederki bukatu ditu, eta arriskatzeko esan diot; harrapatzen zuena bukatzeko»