«Zenbat eta jende ezberdin gehiago bildu, orduan eta hobe», diote Arantzazu Ruiz Miner eta Jesus Uzkudun Illarramendik. Garbi daukate, Gure Esku Dago ekimenaren barruan sartzeko baldintza bakarra dagoela bete beharra: erabakitzeko eskubidearen alde egotea.
Horretarako, eskaera argi bat elkarrekin egiteko, ekainaren 8an 50.000 pertsona bildu nahi dira, Durango eta Iruñea lotuko dituztenak, elkarren artean tarterik utzi gabe.
Hernanitik 600 pertsona bildu nahi dira, Etxarrenera joan, eta km bat osatzeko. Dagoeneko 373 bildu dira. Ziur daude, 600 hernaniar baino gehiago animatuko direla, «badira 1.000 pertsonara iritsiko garela diotenak ere».
«Jende asko ari zaigu inguratzen»
600 lagun biltzeko asmoan, Hernanin taldea osatu da, eta astero biltzen dira, dozena bat lagun inguru, «ideologia guztietakoak». Postua jartzen dute ostegunero eta larunbatero, eta jende gero eta gehiago inguratzen zaiela diote. «Jende asko ari zaigu inguratzen. Batzuk oraindik ez dakite zer den, eta beste batzuk orain ari dira enteratzen», dio Ruizek.
Maiatzean bi festa antolatu dituzte. Maiatzaren 4an Ave Maria parkean herritar eta talde guztiak deitu dituzte parte hartzera, argazki erraldoi bat eta giza-kate bat egin nahi dira «beroketa moduan».
«Ekainaren 8koa pasata, segi egin nahi da, Kataluniako bidean, eta asanblada nazionala egiteko asmoa ere badago»
Maiatzaren 16an, Galarreta frontoian erremonte jaialdi berezia prestatu dute.
Horrez gain, lokal berria daukate, herritar batek muxutruk utzia, eta aste egunez hor egoten dira, egunean bi orduz, informazioa ematen.
Metro bakoitza 5 euroan erosi liteke, baina egun horretan joan ezin duenak ere 0 metroa deitu diotena erosi lezake, egitasmoaren alde. Porra egiten ere ari dira, zenbat hernaniar animatuko diren asmatzeko.
Helburu bakar batekin
Bi hernaniarrek diotenez, berebiziko garrantzia dauka helburu bakar batekin lan egiteak. «Oraingoz ez dago alderdi politikoen eskutan. Nik hori ikusi banu, ez nintzen taldean sartuko», dio Ruizek. Uzkudunen esanetan, alderdien eskuetan erortzeko arriskua badago, baina ez da utzi behar, «hasieran eztabaida izan zen, eredu ekonomikoari buruz kriterio batzuk markatu behar ziren edo ez, baina oso garbi geratu zen ezetz, hortik zatiketa etorriko zela. Erabakitzeko eskubidearen alde egon litezke abertzaleak, federalistak eta españolistak». Ruiz ere konforme dago, «erabakitzeko eskubidearen alde egoteak ez du eskatzen denean ados egoterik».
Euskal Herriko asanblea
Beste herrietan ere sumatzen omen da Hernaniko ilusioa, «animoak altu daude. Ekainaren 8koa pasata, segi egin nahi da, Kataluniako bidean. Ekainean bertan Euskal Herriko asanblada nazionala egin nahiko genuke, eta gauza gehiago ere bai».