Lur Denok elkarteak proiektu berri bat dauka eskuartean: oilategia. Barazkiez gain, arrautza ekologikoak hasiko dira saltzen eta oilategia egin dute. Hilabete barru jarriko dute martxan. 350-400 oilo inguru ekarriko dituzte eta astean, 2.000 bat arrautza aterako dituztela kalkulatzen dute. Proiektuaren berri eman diote Kronikari, Istekot Lizarralde langileak eta Diego Polo bazkideak. «Helburua da, Lur Denokek dieta oso eta orekatua eskaintzea, bere filosofiari jarraituz. Barazkiak, patatak, legunbreak eta beste hainbat produktu badauzkagu. Orain, arrautzekin, saskia osatuko dugu». 4 eurotara jarriko dute dozena.
Herritar guztiei irekia
NER Group taldetik sortu zen Lur Denok orain bi urte. Baratzagintza ekologikoa lantzen du. Eta horrez gain, beste helburu batzuk ere badauzka: utzita dauden lurrak berreskuratu, lanpostuak sortu eta elikadura ekologikoan oinarritutako kultura sortu, hau da, bertatik bertakoa kontsumitu eta garaian garaikoa.
Hasieran, NER Groupen barruan zeuden enpresetako langileak ziren Lur Denokeko bazkide, baina orain irekia da. Edozein herritar egin daiteke bazkide. Bazkide izanda, aukera dago barazki ekologikoez osatutako saski bat hartzeko astero edo bi astero. Bi tamainatakoak daude: 10 eurokoa eta 15 eurokoa. Bazkide egin aurretik, hiru hilabeteko proba egin liteke. Horrez gain, beste eskubide batzuk ere badituzte bazkideek: ekintza desberdinetan parte hartu, baratzen jarraipena egin bertatik...
«Helburua da ahalik eta sozio gehien izatea. Horrela, lur gehiago lortzeko aukera izango dugu eta gehiago zabaltzeko aukera. Eta noski, gehiago eragiteko aukera ere bai, elikaduran, kotsumitzeko ohituretan... », diote. Gaur egun, 256 bazkide dira.
Bertako eta inguruko
produktu ugari
Lur Denokek Astigarragan eta Ajangizen (Bizkaia) dauzka lurrak. Astigarragan 2 hektarea dauzkate, Gurutzeta edo Kabila auzoan eta bi langile aritzen dira. Bazkide eta boluntarioek ere laguntzen dute.
Bertatik barazkiak lortzen dituzte, baina beste hainbat produktu ere jartzen ditu bazkideen eskura Lur Denokek: pasta, esnea, arroza, eztia, ardoa, naranjak, patatak, legunbreak, olioa... Produktu horiek ere ekologikoak dira eta km 0 filosofiari jarraitzen diote. Hau da, bertakoak dira edo ahalik eta gertuenekoak.
Oilategirako pertsona bat
Oiloak zaintzeko pertsona bat beharko luketela azaldu dute, batez ere, asteburuei begira. Baten bat prest egonez gero, jarri dadila harremanetan: lurdenok@lurdenok.com. Bazkide egiteko ere bai. Informazio gehiago: www.lurdenok.com.