Hernaniko elkarte eta taldeei dei egin diete proposamenak egin ditzatela ekainaren 1eko Ziklobiarako. Egun horretan, Donostiatik Hernanirako bidea itxi egingo dute motorra daukaten ibilgailu guztientzat, eta baimena izango dute soilik bizikleta, patin, oinezko eta gurpildun aulkiek.
Festa haundia izango da Hernanin, eta Hernaniko Udalak jakinarazi du ahalik eta herritar gehienek parte hartzea ondo legokeela, eta horretarako, hainbat postu edo ekintza egitera animatu nahi ditu taldeak. Ekintza proposamenak ostirala bitartean jakinarazi behar dira, helbide honetan, eta gero, hortik, arduradunei bidaliko zaizkie: ziklobia@hernani.net.
Olatu Talkaren barruan
Donostia Kulturaren barruan, eta Olatu Talka ekimenean dago Ziklobia, eta iaz Zubietara bezala, aurten Hernaniraino ekarriko dute. Donostia, Martutene, Astigarraga eta Hernani lotuko dituzte, 7 km inguruko ibilbidean, eta egun batean mugikortasun iraunkorrari buruz hausnartzeko deia egin nahi dute, modu sinbolikoan, besterik ez bada ere.
Lehenengo Ziklobia Bogotan egin zen 1976an, eta gaur egun 38 hiritan egiten da.