Aste Santuko jai egunak Hernanin pasatzea erabaki dutenek herriko historia eta txoko pribilegiatuak ezagutzeko aukera ederra dute gaur. Udaleko Turismo Sailetik bi plan proposatu dituzte debalde: bat goizean eta bestea arratsaldean.
Tren berdean, buelta
Bereziki umeei zuzendutako plana da, arratsalderako proposatu dutena: tren Berdea hartu eta Hernanin barrena buelta egitea. 23 minutu inguruko buelta dela azaldu dute, «paseo polita herriko txokoak ikusi edo ezagutzeko».
Hiru buelta egintgo ditu trenak: 16:45etan eta 17:45etan euskeraz emango dituzte azalpenak; eta 17:15etan, gaztelaniaz.
Ibilbidea debalde egiteko aukera jarri badute ere, tren berdera igo aurretik txartela hartu behar dela gogorarazi dute; Turismo bulegoan banatuko dituzte.
Sagardoa eta historia,
beste plana
Hernani, erdi aroa eta sagardoa da goizerako Turismo Bulegoak gaurko proposatutako beste plana. Historiak eta sagardoak bat egiten dute pakete honetan: bisita gidatua erdigunean, tren berdea sagardotegietara eta sagardo dastaketa.
Plana debalde bada ere, parte hartzeko aurrez eman behar zen izena. Apuntatu direnek 10:15etan dute zita, Biteriko turismo gunean.