Musikari gazteak ez dabiltza makal Hernanin. Eneko Sotak, Josune Marinek eta Jon Patxek sari bana ekarri dute Bilbotik, Euskadiko Musikari Gazteen Txapelketatik. Apirila hasieran jokatu zen txapelketa, EAEko hiru kontserbatorioek antolatzen dutena. Sotak irabazi zuen Akordeoiko B mailako sari nagusia. Marinek bigarren saria lortu zuen, Harizko tresnen A mailan; eta Patxek ere bigarren saria, Perkusioko A mailan.
Guztira 104 partehartzaile
Aurten guztira 104 partehartzaile izan dira txapelketan, taldekakoak kontatu gabe. Kontserbatorioko piezak jo behar izan dituzte, bakarrik, hainbat epaileren aurrean.
Josune Marinek Hernaniko Kronikari azaldu dionez, lehiaketa hauetan urduritasunari eustea izaten da zailena, ez daudelako ohituta. Berak hiru obra interpretatu zituen. Fernando Sor-en Opus 28, Villalobosen 5garren Preludioa, eta Eduardo Martinen Mirándote.
Sotak eta Patxek ere tankeran lehiatu behar izan dute, norbere musika intrumentuarekin. Guztira 12 modalitate izan dira, taldekakoak kenduta. Akordeoian dozena erdi partehartzaile izan dira, gutxigorabehera; perkusioan beste 7 inguru, eta gitarra, arpa eta sokazko instrumentuetan 10 partehartzaile inguru.
Urtero antolatzen dute txapelketa hau EAEko hiru kontserbatorioek. Txandaka egiten da, Donostian, Gasteizen, eta aurten Bilbon egin dute. Apirilaren 4an jokatu zuten txapelketa.
Hirurak dira Hernani Musika Eskolako ikasle ohiak, eta gaur egun ere musika ikasketa profesionaletan
ari dira.
Musika Eskolako ikasle ohiak
Hernaniko Musika Eskolan hasi zituzten ikasketak hiru musikari gazteok. Bertan zenbait urte eginda, orain musika ikasketa profesionaletan ari dira: Eneko Sota eta Josune Marin Donostiako Francisco Escudero Musika Kontserbatorio Profesionalean; eta Jon Patxe Errenteriako Musikalen.