ASTE Santuan, udan, zubi luzeetan... urtean badira zenbait garai, etxetik kanpo egun batzuk pasatzeko aproposak izaten direnak. Egun horietan etxeko segurtasuna hobetzeko, eta bide batez, lapurretak saihesteko aholkuak eman ditu Eusko Jaurlaritzako Segurtasun Sailak, Kronikara bidalitako oharrean. Diote, «gogoratu, prebentzioak arriskuak eta ezbeharrak saihesten ditu».
Lehenengo aholkua da, ahal izanez gero, etxe eta garajeetan ate egokiak jartzea, blindatutakoak eta ate-marko sendokoak badira, hobe. Etxeko atea ondo isteak duen garrantzia ere azpimarratu dute. Etxetik ateratzean atea ondo itxi izana ziurtatzea da gomendioetako bat; bestea, barruan egon arren, atea ixtea, bai giltzaz eta baita krisketa edo pestilloarekin ere. Tinbreak jotzen duenean, beste aldean dagoena ezezaguna bada, ez irekitzea gomendatu dute: ez etxeko atea, ezta atezain automatikoa ere. Postontzia portaletik kanpo egotea komenigarriagoa dela diote. Etxeko fatxadak konpontzen ari direnean, adi egotea inportantea dela ere gogoratu dute: «erne andamioekin. Zaindu etxeko leiho eta balkoiak, eta kanpotik ez irekitzeko segurtasun sistemak jarri».
«Gaizkileei ez egin aurre»
Behin etxera itzulita, barruan norbait dagoela konturatuz gero, ez zaiola aurre egin behar gogoratu dute: «ez egin aurre, jar zaitez babesean eta Ertzaintzari deitu». Eta nahiz eta lapurrik egon ez, lapurreta egin dutela konturatuz gero, ezer ez ukitzeko eskatu dute, eta Ertzaintzari berehala deitzeko. Telefonoa: 112.