Aberri eguneko mozioa eta Europako hauteskundeak aztertzeko ez ohiko Plenoa deitu zuen Udalak larunbatean. Gobernu Taldeko bederatzi ordezkariak elkartu ziren; oposizioko zinegotziak ez ziren azaldu. Euskal Herritarrak gara eta ozenki adierazi nahi dugu izenburua zuen mozioa aho batez onartu zuten.
Europako hauteskundeetako puntuan, hauteskundeetako mahaietako ordezkariak aukeratu behar zituzten. Ordezkari horiek ordea, Tokiko Gobernu Batzordeak onartu behar dituela dio legeak, eta Batzorde horren esku uztea erabaki zuten. Erabakia beraz, apirilaren 25eko Gobernu Batzordearen esku utziko dute. Azaldu zutenez, oposizioko alderdiekin hitz egina zuten puntu hau, eta guztiak bat datoz erabakiarekin.
«Dei egiten dugu Aberri Egunean ikurriña jartzeko; eta ‘Gure esku dago’ dinamikak ekainaren 8an antolatutako giza katean parte hartzeko»
Udalbiltzaren mozioa, onartuta
Udalbiltzak 2014ko Aberri Egunerako proposatutako mozioa aho batez onartu zuten Gobernu Taldeko ordezkariek.
Mozioaren sarreran diote, bi aldetan, 685 udalerrietan bizi diren 3 milioi biztanleetatik gehiengoak Euskal Herritar gisa bizi nahi duela: «gure eskubide zibil eta politikoekin bizi nahi dugu, baina zoritxarrez, ez da hori gaur egungo errealitate politikoa. Euskal Herria estaturik gabeko herria da, eta gure borondatearen gainetik, ofizialki behartuta gaude frantziarrak edo espainiarrak izatera».
2014an aukera berezia bizitzen ari garela diote mozioan: «alde batetik nabaria da Espainia eta Frantziaren ezezko iraunkorra... Baina hor daude ere, Europako estatu berrien sorrera, Katalunia eta Eskoziaren autodeterminaziorako erreferendumak, edo Gure esku dago bezala, Euskal Herrian sortzen ari diren ekimen arrakastatsu eta itxaropentsuak».
Bost aldarrikapen nagusi
Hori horrela, eta euskal herritarren egunaren gertutasuna medio, Hernaniko Udalak ondorengo bost puntuak onartu zituen:
«1. Euskal Herritarrak garela adierazteko garaia heldu da eta ozenki esan nahi dugu, erabaki dugula Euskal Herritartasunaren aldeko herri dinamika sortzeko eta sustatzeko deia luzatzea.
2. Gonbidapena luzatzen dugu kalean zein eraikin publiko eta partikularretan euskal ikurrak jartzeko.
3. Oroimen historikoa berreskuratzeko konpromisoa hartzen dugu. Hala ere, iragana baino gehiago, oraina eta batez ere etorkizunari erreparatu nahi diogu. Horregatik, Herritartasun Agiri Ofizialaren beharra aldarrikatu nahi dugu, eta konpromisoa azaldu nahi dugu ekimen bateratua, ofiziala eta eraginkorra sortzeko.
4. Etxarriko herriak apirilaren 13an egin zuen herri kontsultari babesa adierazi nahi diogu.
5. Gure esku dago ekimenak ekainaren 8an Durangotik Iruñara antolatu duen giza katean parte hartzeko deia ere egin nahi dugu, eta oro har, Gure esku dago herri dinamikari babesa adierazi nahi diogu».