Izaera berezia dute Urumea bazterreko herri eta auzoek, pertsonalitate propioa. Zenbaterainoko eragina izan du horretan industrializazioak? Ereñotzuko Auzo Udalak antolatuta, Urumea ertzeko industria ondarearen aztarnak hitzaldia eman zuen asteazkenean Alfredo Morazak, Aranzadi Zientzia Elkarteko kideak. Haritzalde taldeak Ura, ibaiak eta herriak erakusketa jarria du San Telmo museoan, eta honen harira antolatutako hitzaldia izan zen.
Urumea bazterreko industria ondarearen informazioa osatzea, denen lana
«Ez naiz ezer berria deskubritzera etorri, bertakoak zarete eta ondo ezagutzen duzue tokia, ondarea» hitz horiekin egin zuen Morazak, hitzaldiko sarrera. Urumea bazterreko industria ondarea ikertu dute, eta ateratako ondorioen zertzelada batzuk eman zituen asteazkenean. Hasieratik gogoratu zuen, egindako ikerketa abiapuntu bat besterik ez zela, eta oraindik asko dagoela egiteko: «sorpresa bat baino gehiago espero ditugu, lana garatzen doan heinean deskubritzen joango garenak. Puzzle bat osatu behar dugu, guk gure aldetik eta zuek zuen ekarpen eta laguntzarekin, gogoratzen duzuenarekin, etxean dituzuen argazkiekin... zuen laguntza ezinbestekoa da».
Hitzaldiaren sarreran baita ere, Amaia Minerrek, Auzo Udalaren izenean azaldu zuen, lan talde bat osatzeko asmoa dutela, eta lagundu nahi duten auzotar edo herritar guztiak ongi etorriak izango direla.
Aurretik ere, zenbait ikerketa
Hitzaldiari helduta, Morazak azaldu zuen Urumea bailararen ondare industriala zenbait azterketetan ikertu izan dela, baina Ereñotzun konkretuki, benetako azterketarik ez dela egin: «Auzo Udala egiten ari den esfortzua aipatzekoa da, bai ikerketa honekin eta baita hemendik aurrera egin nahi den lanarekin ere». Orain arteko ikerketetarik bat aipatzearren, Moraak esan zuen 2012an Eusko Jaurlaritzak egindako Industria Paisaien Inbentarioan eremu honi atentzio berezia jarri zitzaiola: «Ereñotzutik gorako zatiari lerro asko dedikatu zizkioten. Futbolarekin konparatuko bagenu, Urumeako paisai industrialak 1go mailan konpetitzen zuen. Oso bailara berezia zen, partikularra, beste paisaiekio abantaila asko zituena».
600 urteko historia, lau multzotan banatuta
Mendeetan zehar paisai industriala nola sortu eta garatu den aztertzeko faktore ezberdinak kontuan hartu behar direla azaldu zuen Morazak: «600 urteko historiaren zama dugu. Natura eta industriak bat egin dute Urumea ertzean, unitate bat balira bezala funtzionatu dute. Paisaia, poliki, birdibujatzen joan da. Basoak ziren tokian beste baso mota batzuk sortu zituzten, errekak ziren tokian presak...».
Azterketa lau atal edo multzotan banatu dute: burdinolak, errotak, indarretxeak eta beste eremu industrialak. Morazaren esanetan, guztiek elementu bera dute komunean: Urumea edo aldameneko errekak. Ura erabiltzen zuten indarra sortzeko.
«Burdinolak izan ziren industrializazioaren aintzidari, Erdi Arotik Aro Modernoraino funtzionatu zuten; ez da apenas aztarnarik geratzen».
Burdinolak, bailarako ekonomia suspertzaile
Lau multzoak kontuan izanda, burdinolak dira nagusi Urumea bazterrean. 14 burdinola dituzte dokumentatuta eta Erdi Arotik Aro Modernora funtzionatu zuten, XIX. mendera arte.
Erdi Aroan burdinolak izan ziren bailarako ekonomia suspertu zutenak: «dirua ekarri zuten, eta hori denean nabaritzen zen: baserriak eraikitzerakoan, Donostia eta inguruko jauntxoek inbertitzerakoan... Diru asko, etekin haundia ematen zuen negozioa zen. Garai hartan baserrietan egiten zuten askok lana, eta denbora librean ikazkin lanetan, garraioan... egiten zuten lana. Bailara honetan zegoen inguruko rentarik altuena, kalean baino diru gehiago zegoen bertan».
Urteak pasa ahala, teknologia aurrerapenak zirela eta, fosilizatzen joan zen negozioa izan zen. Mantenimendu haundia eskatzen zuten eta etekinek ez zuten koadratzen; «hala, banan bana ixten hasi ziren, abandonatzen, transformatzen...»
Gaur egun ez da aztarna askorik geratzen. Burdinola asko egurrezkoak ziren: aldaparoak, presak, kanalak... egurrez egiten ziren. Inguruan zuten materiala zen, merkeena eta hori aprobetxatzen zuten: «egurra erraz galtzen den materiala da, asko usteldu egin dira, ez dira kontserbatu... aztarna oso gutxi dago gaur egun». Transformatu ziren burdinoletako batzuk, baserri bihurtu ziren. Beste batzuetan, egitura aprobetxatu eta, errotak edo indarretxeak eraiki zituzten; Lastaolako kasua, esaterako. Aparrain inguruan ere, zenbait pareta geratzen direla azaldu zuen Morazak: «Epele aldeko presa ere hor dago, zepadiren bat han eta hemen... baina gutxi gehiago».
Hernaniko aingurak, Europaraino
Hernaniko fabrikan egiten ziren aingurek Europa osoan zuten sona. Erret Aingura fabrika deitzen zitzaien Hernaniko hiru fabrikek sortu zuten taldeari: tartean, Fagollagakoa eta Pikoagako burdinolak. Erregearentzako aingura edo anklak egiten zituzten bertan, besteak beste. Korteekin zuten tratua medio, kontratu oso bereziak, onak lortu zituzten. 1750etik aurrera kontratu haundiak lortu zituzten. Taldean burdinola bat baino gehiago egon arren, tailer guztiak Fagollaga inguruan kokatu zituzten. Fabrika nagusia bertan zuten, eta bertatik 300 bat aingura atera zirela kalkulatzen da. Urte oparoenak 1750-1800 ingurukoak izan ziren. Gaur egun ez dago apenas aztarnik, langileentzako egindako etxeak bakarrik geratzen dira.
Errotak, janaria lortzeko iturri nagusia
Industria ondareko bigarren elementu nagusia errotak dira. Burdinolek baino askoz gutxiago funtzionatu zuten Urumea bazterrean. Garrantzia haundia izan zuten ordea, herrirako janaria lortzeko: bertan txikitzen ziren garia, garagarra... 18garren mendetik aurrera, bertan txikitutako janaria astoarekin garraiatzen zuten auzo eta herrietara: «errotek eta bertan produzitzen zenak zuen garrantziaren seinale da, Udalak kontrolatzen zuela prezioa, espekulaziorik egon ez zedin».
Jasotako datuen arabera, bost errota zeuden inguru honetan, eta horietako asko, burdinolak aprobetxatuta eraikiak: «Bekoerrota eta Pikoaga dira horietako bi; Epelen eta Ereñotzun ere, bazeuden. Burdinolak ordurako ez ziren negozio, eta azpiegitura bikiak zituzten, beraz aproposak ziren».
Geratzen diren azternei erreparatuta, ez dago ezer askorik: «Epeleko harriak ikusi litezke oraindik: ura ateratzeko kanalak, sobrantea... Pagoagak izena mantentzen du, baina desmantelatuta dago... Orain 50-60 urtetik ez dago errotarik bailara honetan. Gure ikerketen arabera, Ereñotzuko zentralaren aldamenean zegoela uste dugu; eta gutxi gehiago».
Indarretxeak ia osorik mantentzen dira
Sei bat indarretxe daude Ereñotzuko bailaran, eta Morazaren esanetan, altxor berezi bat dira: «Euskal Herrian zaila da gune berean hainbat indarretxe batera ikustea, eta hare gehiago, hain ondo mantenduta egotea. Kontserbazio aldetik oso ondo daude eta pista asko ematen dituzte aurreko industrializazioa ulertzeko».
Lastaolako indarretxea adibide bezala jarri zuen Morazak, kasu berezia zelako. 1896an sortutako indarretxea zen Lastaolakoa, baina ez zen jabe pribatukoa. Udalak bultzatutako indarretxea zen, helburu garbiarekin: herriari argia ematea. «Tolosa, Eibar, Donostia eta Bergararekin batera, aintzindari izan zen Hernani. Herriari argia emateko beharrari erantzuteko sortu zituzten indarretxeak, eta ez zuen negozio soil bezala funtzionatzeko» azaldu zuen Morazak. Barrualdean zer kontserbatzen den jakitea zaila dela ere azaldu zuen Morazak: «posible da turbina pare bat izatea, aurrerago jarri zitzaion diesel motorra... Orain administrazioarekin borrokan gabiltza, barrura sartzeko giltza magikoa zeinek daukan jakin nahian».
Lastaolako zentrala txukundu eta martxan jartzea, etorkizuneko nahia
Beste hainbat tokitan egin den moduan, hemen ere, proiektu honen helburuetako bat izan daiteke ondarea berreskuratu eta bisitatzeko moduan jartzea. Morazaren esanetan, Lastaolako indarretxeak bete ditzake baldintza horiek: «esku publikoena da, eta bide hori errazagoa izan liteke. Martxan jarri daiteke, jendeak bisitatu ahal izateko, ikastoletako umeak ikustera gerturatzeko... baina hau proiektu honen hirugarren edo laugarren fasea litzateke».
«Latse fabrikako kalderak balio haundia du, ia ezinezkoa da pareko bat bilatzea; eta pena litzateke halako altxorra galtzea»
Fagollaga, industrializazioaren eredu
Ondare industriala aztertzeko laugarren multzoari, beste jarduera industrialak izena jarri dio Morazak. Industrializazio prozesua ondoen antzeman liteken fabriketako bat, Fagollagakoa dela azaldu zuen Morazak: «15garren mendean eraiki zuten burdinola; hura abandonatu, eta 17garren medean jarri zen berriz martxan. Ondoren, Erret Fabrikaren parte izan zen. 19garren mendean, Karlistadetan, munizioa egiteko erabili zen; telleri bezela ere, funtzionatu izan du; 1867an, Hernaniko aurreneko paper fabrika jarri zuten bertan, beranduago, abandonatu eta jabe berdinek Zikuñagakoa jarri zuten martxan; porlan fabrika ere izan zen Fagollagakoa, 1902an eraiki zuten eta zazpi urtez besterik ez zuen funtzionatu. Eta azkenik, zentral gisa funtzionatu zuen».
Latseko fabrika, galtzen ari den altxor txikia
Ereñotzura gerturatuta, Latseko fabrikaren kasua ere azaldu zuen Morazak. Orain arte nahiko ondo mantendutako fabrika dela gogoratu zuen Morazak, baina geroz eta notizia txar gehiago ari direla jasotzen: «pareten bat erori dela... poliki-poliki galtzen arin den altxor txikia da». Latse fabrikak kokapen estrategikoa zeukan, ibai ertzean baitzegoen. Bere garaian burdinolen bat egon izanaren zantzua dute. Latsek aldamenean zituen beharrezkoak zituen errekurtso naturalak, tartean, egurra. Fabrika hau 1892an sortu zen, baina Oriamendi ondoan. Erre egin zen, eta egurraren falta eta kostu altua medio, gaur egun dagoen tokira eramatea erabaki zuten. Erakusketa konkurtso eta dominak irabazitako fabrika ere izan zen «orduan ez baitzegoen egiten zuten produktua ezagutarazi eta publizitatzeko beste modurik».
Funtzionamendurako egurra erabiltzen zuten, eta merkatuak eskatzen zituen produktuak ekoizten ziren Latse fabrikan: «estanpadoak, alktrina, brea, azido opialinosoa, sosa sulfatoa, jateko eta makinentzako ozpina... denetatik fabrikatzen zuten egurraren dizdirarekin».
Fabrika gisa ere, Latse eredugarria dela azaldu zuen Morazak: «tximinia du ikono. Arkitektura aldetik, oso elementu bereziak ditu; eta guztien artean balio haundiena kalderak dauka. 1884ko kaldera da, eta Euskal Herrian ez dago besterik; eta Estatuan, oso gutxi. Enkofratu baten barruan egon da orain arte eta ez dakit zenbat gehiago iraungo duen. Altxor bat da, joia bat... Antzeko bat bilatzea ia ezinezkoa da, eta hare gutxiago, oraindik bere lekuan mantentzen den bat. Xarma haundia du, eta pena litzateke hori jakinda galtzea».
BURDINOLAK (14)
Abillats, Aparrain, Bazterrola, Bezkita, Epele, Ereñotzu, Fagollaga, Lastaola, Latse, Olaberriaga, Pagoaga, Pikoaga, Ubarratu eta Urruzono.
ERROTAK (5)
Bekoerrota, Epele, Ereñotzu, Pagola eta Pikoaga.
INDARRETXEAK (6)
Ereñotzu, Fagollaga, Lastaola, Pikoaga, Santiago eta Urruzono.
BESTE JARDUERAK (3)
Epele, Fagollaga eta Latse.
«Denen artean egin beharreko lana da: ondarea aztertu, babestu eta ahal den neurrian errekuperatu»
Lan taldean parte hartzeko aukera dute nahi duten guztiek.
IKERKETA gazi-gozoa izan dela azaldu zuen Morazak. Gazia, aztarna gutxi mantentzen direlako, eta daudenak, galbidean daudelako. Gozoa, perspektiba baikorra delako, lanean jarraitzeko asmoa dagoelako.
Amaia Minerrek hasieran aipatu bezala, lantaldean aritzeko asmoa gogoratu zuen Morazak, eta elkarlanaren garrantzia azpimarratu zuen «ondare hau zuen esku dago, atxor txiki bat da eta helburuak bat izan behar du: ondarea azaleratu, babestu eta ahal den neurrian errekuperatu. Gure arbasoek bertan egin zuten lana, beraien ogibidea zen... Zorionez, zuek bihurtu zarete aztarna hauen zaindari. Instituzio, erakunde eta inguruko industriek ere, lagundu beharko lukete. Bailara hau ez da edozein adibide, ez du parekorik».
Lantaldean aritzeko aukera
Proiektu honen parte izan eta lantaldean aritu nahi duenak badu aukera. Auzo Udalera jo behar du, laguntza eman edo lanerako prest dagoela esatera.