Autobus zerbitzua hobetzeko parte hartze prozesua jarri zuen martxan Gipuzkoako Foru Aldundiak 2013ko urrian. Herritarrek beren beharrak zein diren azaldu zuten, eta horiek kontuan hartuta, aurreproiektu bat osatu du Aldundiak. Gaur bilera egingo du hernaniarrekin, aurreproiektu hori nolakoa den azaltzeko, 18:30etan Biterin. Herritarrek, beste behin, aukera izango dute iritzia emateko, eta proiektu definitiboa osatuko du ondoren Aldundiak.
Aldaketak, hainbat lineatan
Hernaniarrek lehenengo fasean emandako iriztiak kontuan hartuta, Aldundiak hainbat aldaketa proposatu ditu.
Batetik, A1 linea (Astigarraga eta Martutenen barrena Donostiara dijoana) gutxiagotan pasako da; orduro, eta ordu puntetan, ordu erdiro. Bestetik, A2 linea (Astigarragan barrena Donostiara zuzenean dijoana) 20 minuturo jarriko da. G1 eta G2 bere horretan mantenduko dira, ordu puntetan ez duelako arazorik ikusten Aldundiak, baina Galarretan T2 eta T6 autobusekin koordinatuko dira. Hernani-Pikoaga linea, berriz, taxi/bus zerbitzua bihurtuko da. Ospitaleetara dijoan linea zabaldu egingo da. Eta, azkenik, ostiral gauetan autobusen zerbitzua gaueko 01:00ak arte luzatuko da. Errekaldeko geltokiaren egoerari ez dio erantzun zehatzik eman, oraingoz.
Iritziak jaso, apirilaren 15 arte
Aldundiaren proposamenaren inguruko iritziak jasoko dira apirilaren 15 arte, bileran edo www.garraioahobetzen.net.