Euskaraz egindako zazpi pelikula edo film labur jarriko dituzte gaur Biterin, arratsaldeko 19:00etan hasita. Dobera Euskara Elkarteak urtero antolatzen duen Laburbira zikloa da; sarrerak bi euro balio ditu (bazkideentzat, euro bat).
Film horietako batzuk aktore eta ekoizle amateurrek egindakoak izango dira, eta profesionalek egindakoak, beste batzuk. Horietako bat, Iñaki Beraetxe zuzendari eta aktorea, solasaldian izango da, proiektzioen ondoren.
Euskarazko 7 pelikula
Zazpi izango dira gaur ikusi ahal izango diren film laburrak: Pello Gutierrezen Abuztua; Erabaki Produkzioak ekoiztetxe amateurraren Aio; Kepa Errasti aktorearen eta Loramendi euskara elkartearen Euskaldun berriaren esketxa; Aitor Gametxo, Maider Fernandez eta Maria Elorza gazteen Irudi Mintzatuen Hiztegi Poetikoa; EHUko ikasleen Plaza Bakarra; Lara Izagirreren Sormenaren Bide Ezkutuak; eta Iñaki Beraetxe aktore eta zuzendariaren Marylin.
Solasaldia, Beraetxerekin
Aktore lanetan ezaguna da Iñaki Beraetxe; Goenkale eta Mugaldekoak telesailetan, batez ere. Baina gaur gidoigile eta zuzendari moduan hitz egingo du, solasaldian.