Aste Santuan hernaniarrak kanpora ateratzen dira, baina badira Hernanira etortzen diren kanpotarrak ere. Txotx denboraldian bisitari asko izan da, baina Aste Santuan ere bisitariek ez dute ahaztu Hernani. Pardiola nekazal turismoa eta Txintxua Hotela bete egin dira, ia urtero bezala, eta Pazko Astean kontua lasaitu egingo dela diote.
«Sagardoaren kulturak bisitari asko erakartzen du. Sagarrak eta sagardoak herri honetan izan duen garrantziak interes haundia pizten du»
Bisita gidatuek eskari haundia
Aste Santuko eskaintzan bete betean harrapatu dugu Maria Eizagirre, Hernaniko Turismo Bulegoko langilea. Bisita gidatuek aurten sekulako tiradizoa izan dute, eta 130 inguru egin omen dituztela adierazi dio Kronikari. «Ia astebururo izan ditugu. Kanpotik etortzen den jendeak, normalean sagardotegira joateko plana daukatenak, aurretik animatu eta bisita gidatua egiten dute», dio Eizagirrek. Trenean ibili eta kata gidatua egiten dutenak ere dezente dira.
Jendeak oso gustora egiten du bisita gidatua, eta harrituta geratzen dira Hernaniko Kaxkoarekin eta historiarekin, «Kaxkoko zenbait jauregik atentzioa ematen die, eta baita harmarriek ere. Beste gauza bat bada, kanpotarrak harrituta geratzen direna, Kaxkoko Karkaba zaharra». Jakina denez, Kardaberaz eta Kale Nagusiaren artean beste kale bat bazen lehen, eta oraindik ere hortxe dago. Baina kuriosoa bada ere, hernaniarrak harritzen dira gehiena Hernaniko Kaxkoarekin, «hernaniarrek ez dakite zenbateko balioa duen Kaxkoak».
Sagardoaren kulturak erakartzen du jendea Hernanira, Eizagirreren esanetan, «lehengo legeak nola ziren azalduta kanpokoak eta bertakoak harritzen dira. Garai batean sagarrondo bat haustea heriotza zigorrarekin ordaintzen zen. Pentsa ze toki hartzen zuen sagardoak gure herrian».
Bisita gidatuez gain, aurten Tren Berdeak ere arrakasta izan du. Aurten trenean gehien ibili direnak Hernaniko gazteak izan omen dira, euro baten truke buelta egin dutenak.
Maria Eizagirre, turismo langilea: «Adibidez, kanpotarrak harrituta geratzen dira Hernaniko Kaxkoko Karkaba zaharrarekin»
Kataluniarra aurten ere, inor baino gehiago
Aurten ere Aste Santuan Kataluniatik etorri da jende gehiena. Madrildarrek ere asko direla adierazi diote Kronikari Pardiolak eta Txintxuak, baina badira beste herrialdeetakoak ere. Txintxua Hotelean Castilla la Manchako jendea ere badaukate, eta baita Zaragozakoa ere. Aste Santua ona izaten da Hernanin, eta hau bukatuta, espero dute udara iazkoren antzekoa. Txintxuara Holanda eta Frantziatik ere etorri omen ziren iaz, besteak beste. yy