Saio horietan landuko denari buruz hitz egin du Urko Arozenak Kronikarekin. Zoriontasuna lortzeko eskura ditugun baliabideak landuko ditu, doan, bi saiotan.
Gure burua trebatzea nahikoa da zoriontsu izateko?
Entrenamendu Mentalarekin zoriontsuagoak izan gaitezkeela argi daukagu; azken txanpa hori aurreratzeko bidea egitea litzateke helburua, erabat zoriontsuak izatea lortzea. Horretarako, kontutan izan behar dugu guk pentsatzen dugunaren arabera sentitzen dugula eta noski, sentitzen dugunaren arabera interpretatzen dugula gure errealitatea.
Denok ezagutzen dugu gure buruko zomorroa, gu era bortitzean erasotzen gaituena. Zomorroa hezi eta gure alde lanean jartzea da hemen bilatzen duguna.
Zein dira klabeak zoriontsu izateko?
Zoriontsua izateko, lehenengo, zoriontsua izan nahi behar da. Eta zoriontsua izan nahi badut, agian orain edo momenturen batean behintzat aitortu behar dut ez naizela hain zoriontsua. Behin gure egoera errealaz ohartu eta hau den bezala onartzean, gertatzen zaizkigunak gure pertzeptzioen araberakoak direla konturatuko gara. Gure pertzeptzioak edo programak aldatzea da klabea, hauen arabera interpretatzen baitugu gure bizitza.
Denek berdin ulertzen al dugu zoriontasuna?
Inolaz ere ez! Gehiago esango nuke: unibertsitatean, aspaldi ari da Psikologia Positiboa zoriona zer den definitzen eta, nahiko lan! Pentsatu norberak bere barruan sentitzen duenak zer nolako gorabeherak izango lituzkeen! Norberak bere erara ulertzen duen arren, ederki aski dakigu noiz garen zoriontsu!
Zein eragin dauka gure inguruak, eta ingurukoei gertatzen zaienak gure zoriontasunean?
Guk onartzen dugun neurrian, erabateko eragina dauka kanpoan gertatzen den horrek. Inguru alai eta maitagarrian hazi denak nekez biziko du tristura, eta egunero telebistako desinformazio negatiboa jasotzen duenak nekez egingo du parra algaraka. Denok nolabait lotuta gaude, erlazionatuta gaude eta noski, horrek eragitea oso erraza da. Hala ere, eragin hau zein neurrikoa den norbere esku dago, eta bide bat baino gehiago dago inguruak guregan eragiten duen horretatik beti irabazian ateratzeko.
Nola egin aurre ezbeharrei?
Erakarpenaren legea kontuan izanik (eskaintzen duguna jasotzen dugula), ustezko ezbehar hori beste era batetara ikusi eta biziko dugu: guretzako ikasketa dakarren esperientzia bezala. Ezbeharra gertatzean egoera deserosoa bizi ohi dugu, baina nori ez zaio gertatu halako ezbeharraren ondoren pertsona zoragarriren bat ezagutzea edo eman behar izan duen aldaketarekin irabazian ateratzea? Ongi etorria, beraz, ezbehar hori!
Zergatik aipatzen duzu "transgenerazionala"?
Transgenerazionala gure inkontzientean oinarritua dago. Inkontzienteak gertatzen den guztia grabatzen du, gure arbasoei gertatutakoa barne. Gure arbasoek kontatu ez dizkiguten sekretu horiek gure bizitza erabat markatuko dute, konturatu arte, behintzat. Adibidez: aitonak ikasteko aukerarik ez bazuen izan, guk nahi eta nahi ez ikasi beharra bizi genezake, gure bizitza erabat baldintzatuz. Amonak etxetik ateratzea ez bazuen lortu, guk agian ezingo dugu etxean egon. Ekilibrio bilaketa bat gertatzen da, sekretu horiek plazaratuaz.
Zein izango dira klabeak emango duzun tailerrean?
Lehenengo zatian praktikatuko ditugu baliabideak, Entrenamendu Mentalarekin zoriontsuak izateko bidean daukagun arduraz konturatzeko. Bigarren zatian, transgenerazionala landuko dugu eta horretarako gure aiton-amonetaraino familiakide guztien jaiotza eta heriotza hilabetea eta eguna ekartzea komeni da.