Azken minutuak beti ezberdinak izaten dira partidu batean, eta hor bidea garbi ikusten duenak sarritan lortzen du berak nahi duena. Atzo Cafes Aitona taldeak horixe egin zuen; azken minutuetan gehiago asmatu. Eta 65-74 irabazita, etxera.
Berdinduta joan zen partidua. Sailkapenean enpate zeuden bi taldeak, atzeko postuetan ez sartzeko borrokan, eta hori antzeman egin zen jokoan, eta giroan. Giro bikaina atzo kantxan, eta Hernanik bere zaletuak ilusionatu ere egin zituen momentu batzuetan. Hirugarren laurdenean, 10-0-ko partziala eta Hernani 7 puntuz aurretik ere egon zen. Hortik aurrera, ordea, ideiak bukatu eta aukerak galdu. Baloiren bat ere galdu zuten, eta Cafes Aitonak ederki aprobetxatu zuen.
Bi partiduren faltan
Liga bukatzeko bi partidu falta dira. Hernanik atzetik beste hiru talde baditu, eta ez du arriskurik. Dena dela, sailkapena pixka bat itxuratzen saiatuko dira. Datorren astean Alde Zaharraren kontra, etxetik kanpora. Lanerako partidua.