XIX. Dantzari Festa da aurtengoa. Gaur hasi eta datorren asteko larunbatera bitartean, Euskal Herriko dantzak ikusi eta baserritarren jantzien inguruan ikasteko aukera izango da.
Gaur, Ttarla dantza taldearen eta Zugazti musika taldearen Zura emanaldia izango da, 22:00etan kiroldegiko frontoian. Aurretik, 19:00etan, erromeria izango da Plaza Berrin Alaken taldearekin.
Jaialdiko egun potoloena, berriz, biharkoa izango da. Euskal Herri osoko 15 dantza talde ibiliko dira Hernaniko auzo eta kaleetan zehar dantza emanaldiak egiten.
Bestalde, astelehenetik ostiralera bitartean, euskal jantzien erakusketa ikusi ahal izango da Biterin, 17:00etatik 20:00etara, eta asteazkenean, hitzaldia emango du Ramon Garciak, 19:00etan Biterin, baserritarren janzkeraren inguruan.
Azken egunean, datorren larunbatean, Gipuzkoako zazpi dantza taldetako dantzari txikienen eguna izango da. Eta eguna bukatzeko, Jeiki Hadi taldearekin erromeria egingo da Plaza Berrin 19:00etan.
Bihar, Dantzari Festan lehenengo aldiz, Hernaniko erraldoi eta buruhaundiak ibiliko dira Kaxkoan.
Hamabost dantza talde bihar herrian, 11:00etatik aurrera
Hernaniko kale eta auzo guztietara iritsiko dira bihar Euskal Herriko zazpi probintzietako dantzak.
Auzo bakoitzean dantza-talde baten emanaldia ikusteko aukera izango da, 11:00etatik aurrera. Ereñotzun, Iruñeako Ortzadar taldea; Oialumen, Gasteizko Adurtza; Osiñagan, Sestaoko Arriskugarri; Zikuñaga eta Karabelen, Donostiako Trebeska; Gartzia Goldaraz eta Carmelo Labaka inguruan, Irungo Egoipar Meaka; Florida eta Etxeberrin, Iribaseko Baskaitz taldea; Sagastialden, Gabadiko Iruski; Antziolan, Errenteriako Ereintza; Sorgintxulon, Donostiako Goizaldi; Marieluts eta Latsunben, Larraingo Erregetxopitak, Santa Barbara eta Txantxillan, Donostiako Eskola; Elizatxo eta Portun, Pasai Antxoko Alkarkide; Kaxkoan, Hernaniko Ttarla eta Añorgako Arkaitz taldeak; eta Lizeagan, Elizondoko Baztandarrak.
Bestalde, Hernaniko erraldoi eta buruhaundiak ere ibiliko dira Kaxkoan barrena, Dantzari Festan lehenengo aldiz.
Osiñagako Auzo Elkarteak dei egin du, emanaldira joateko
Borda Berriko atarian egingo du dantza Sestaoko Arriskugarri dantza taldeak eta Osiñagako Auzo Elkarteak dei egin die auzotarrei ikustera azaltzeko.
Ttarla eta Zugazti
‘Zura’ emanaldi berezia gaur, frontoian
Dantzari Festaren harira, Ttarla dantza taldeak emanaldi berezi bat prestatu du gaurko. Hernaniarrek osatutako Zugazti musika talde berriarekin batera, Zura emanaldia eskainiko du, gaueko 22:00etan hasita, kiroldegiko frontoian. Ttarla dantza taldeko helduenek dantzatuko dute bertan, urte osoa eman baitute ikastaro berezi bat egiten.