‘Apustua’ izeneko lanarekin Portugaleteko Uri Urena komiki lehiaketako bigarren saria jasoko duzu gaur. Sorpresa?
Sorpresa izan da, bai. Egindako lanarekin nahiko gustora geratu nintzen eta agian bigarren mailako sariren bat jasotzeko esperantza txiki bat banuen, baina ez nuen espero bigarren sari nagusia irabaztea.
‘Apustua’ da izenburua. Nondik ideia?
San Telmo museoan harriari buruzko erakusketa bat egon zen joan den urtean. Zuzendariari entzun nion irratian, joan den mendera arte, ia baserri guztietan izaten zela harri haundiren bat. Gazteak harri haien bueltan bildu eta apustuak egiten omen zituzten; eta horrela hasi omen zen harrijasotzaile tradizioa. Kontestu horretan girotutako istorio bat egitea erakargarria iruditu zitzaidan eta hortik etorri zen beste guztia. Amodioa, lehia...
Euskal Herriko lehiaketa inportanteenetakoa da. Ze suposatzen du sari honek?
Harro sentitzeko moduko zerbait da. Sari ekonomikoaz gain, lanean jarraitzeko motibazio izugarria da. Kontuan izan Euskal Herria, Espainia eta Hego-Amerikako egileen lanak izaten direla; joan den urtean 200 bat inguru. Bigarren postuan geratzeak meritu haundia duela uste dut, eta batez ere errekonozimendua da inportantea.
Joan den urtean, lehiaketa berean, Euskarazko egile onenari accesit saria jaso zenuen. Halako sariek onuraren bat ekartzen al dute?
Egia esan, ez. Komiki lehiaketek, Euskal Herrian behintzat, ez dute oihartzun handiegirik argitaletxeetan edo lana sortzean. Horretarako ilustrazio lehiaketetara jo behar da, baina hori beste istorio bat da.
Komikigile bat bizi al liteke komikiak egitetik?
Komikiak egitetik ez. Marrazkilari bezala tailerrak, hitzaldiak, lehiaketak, kolaborazioak etabar egiten badituzu agian bai. Horretarako ordea, beste pausu kualitatibo bat eman behar da: album bat edo comic-book bat publikatzea lortu, adibidez. Zure izenak ezaguna izan behar du.
Zer duzu orain eskuartean?
Udan argitaratuko da ilustratzaile gisa egin dudan azken lana, Iñaki Zubeldiak idatzitako Kanguruak zootik ihesi ipuina. Lan eskasia horrek animatu ninduen lehiaketetan parte hartzera, eta urtean laura aurkeztuko naiz. Orain Basauriko Ganorabako lehiaketan aurkeztu dut komiki bat eta ea zortea dudan!