Hernaniko Udalak makinak jarriko ditu Hernaniko parke edo ibilbideetan, ariketa fisikoa egiteko, eta horretarako adinekoen laguntza eskatu du. Ze modutako makinak jarri eta non jarri jakin nahi du Udalak, eta adineko 100 pertsona inguruk dagoeneko bere iritzia eman dute.
Hernaniko mapak jarri dituzte kiroldegian, Biterin, Zaharren Egoitzan eta Goiz Eguzkin, eta edozeinek hartu eta bete ditzake galderak, eta apirilaren 9rako entregatu.
Datorren astean bi bilera egingo dituzte Goiz Eguzkin, apirilaren 8an eta 11n, 17:00etan, eta herritar guztiak daude bertara gonbidatuak. Apirilaren 8an erabakiko zer hartu behar duten kontuan makinak jartzeko lekua erabakitzeko: agerian dauden edo ezkutuan, umeen parkeetatik gertu edo urruti, denak batera edo banatuta...
Apirilaren 11n erabakita utzi nahi dute, zehatz, ze makina eta non jarriko diren.
Aurrekontua, 35.000 euro
35.000 euro dauzka Udalak horretarako, eta maiatzerako jarri nahi dituzte makinak. Atzo azaldu zuten proiektua prentsaurrean Luis Intxauspe alkateak, Glori Mendinueta zinegotziak, eta Juanma Murua kirol aholkulariak.