GRAVNI Txapelketako 4garren partidua jokatuko dute gaur hiru pelotari astigartarrek. Iparraldekoak izango dituzte aurkari, Irurako frontoian, arratsaldeko 16:30etatik aurrera. Argoitz Otaño jubenilarena bigarren partidua izango da, eta Oier Gurutzealde eta Xabier Barandiaran bikotearena, arratsaldeko seigarrena.
Lesionatu arren, beti aurrera
Sub22 mailan, bikoteka elkarrekin jokatzen ari dira Xabier Barandiaran eta Oier Gurutzealde, GRAVNI Txapelketan. Argoitz Otaño, berriz, jubenil mailan ari da Xabier Azpiroz oiartzuarrarekin. Trinketean dabiltza denak.
Urtero esaten da, baina aurten ekipo ona daukagu, konpletoa, lehengo urtean baino hobea
Barandiaran eta Gurutzealdek bi partidu irabazi (Araba eta Bizkaiaren aurka) eta bat galdu (Nafarroaren aurka) dituzte orain arte. Gainera, Barandiaranek ez zuen jokatu lehengo asteburuan Bizkaiaren kontra, lesio bat medio, baina gaurko prest dago.
Otaño ere eskuko minez ibili da, baina partidu guztiak jokatu ditu. Azkenekoa, Bizkaiaren kontrakoa, irabazi egin zuen.
Trinketean ondo zaildutako aurkariak gaurkoan
Aurtengo GRAVNI Txapelketan aurkari bat gehiago dago, aurten, lehenengo aldiz, Iparraldeak ere parte hartzen baitu. Hauen aurka jokatuko dute astigartarrek gaurkoan, hain zuzen.
Emoziorik ez da faltako, inondik ere. «Esperantza irabaztekoa daukagu! Baina, ea gero zer egiten dugun!», dio Barandiaranek. Gurutzealdek ere badu esperantza. «Iparraldekoak hobeak izango ote diren pentsatzen dugu, trinketerako ohitura dute-eta... Hala ere, lehengo asteburuan bizkaitarrek irabazi egin zieten!». Eta Otañok berehala galdetzen du: «nere mailan, jubeniletan, ere bai?». Eta Gurutzealdek erantzun: «hori ez dakit!».
Erraza ez da izango, baina aurrera egiteko gogorik ez dute falta astigartarrek.
Herriartekoa, hurrengo helburu
Hiru astigartarrak Mundarro pelota taldekoak dira, eta primeran dabiltza. Barandiaran bera Gipuzkoako azpitxapelduna da, eskuz banaka, 1go mailan. Gurutzealde, berriz, 2garren mailako azpitxapleduna da. Hurrengo helburua herriarteko txapelketa dute. «Urtero esaten da, baina aurten ekipo ona daukagu, konpletoa, lehengo urtean baino hobea».