Bigarren itzuli zoragarria egiten ari da Hernani eta ez du askorik falta, maila mantentzeko beharrezkoak dituen puntuak lortzeko. Bide horretan zita garrantzitsua dute gaur. Madrilgo Tres Cantos zelaian jokatuko dute, Atletico Madriden kontra. Partidua 12:00etan hasiko da eta internetez zuzenean ikusteko aukera jarri dute www. rugbyatleticodemadrid.com web orrian.
Borrokarako prest
Bosgarren sailkatua da Atletico de Madrid taldea eta play offak jokatzeko sailkatzea dute helburu. Beraz, partidu zaila eta gogorra dutela jakinda egin dute Madrilerako bidaia hernaniarrek. Bigarren itzuli ederra egiten ari dira hernaniarrak ordea, eta erakutsi dute ezustekoak emateko gai direla. Hortzak ondo estutu eta garaipena izango dute helburu, gaurkoan ere.
Atletico de Madrid: gogorra aurrean, azkarra lerroan
Talde madrildarra definitzeko bi faktore izan behar dira kontuan: talde gogorra dira aurrean, eta azkarrak lerroan. Esperientzia haundiko jokalariak ditu aurreko lerroetan: Salazar, Onega eta Brasca kasu. Atzean Canosa erdilariak ematen die esperientzia; aipatzekoak dira baita ere, Armental, Balbin eta Martin. Kontuan hartu beharreko bajak ere baditu Atletico Madridek: Ibarburu harroina min hartuta dago eta Fontesana Hong Kongeko serieak jokatzen ari da.