EAJ-PNV alderdiak dio, ez alkateak ez Bilduko gobernuak ez dutela adorerik izan herriaren interesak ezker abertzalearen interesen gainetik jarri, «eta gutxienez, herri galdeketa egiteko». Hala azaldu du: «2012ko otsailaren 22an ezker abertzaleak prentsaurreko bidez adierazi zuen Gipuzkoako 34 herrirentzat zeukan legealdirako proiektua: atez ateko zabor jasotze sistema ezartzea. Nahiz eta hauteskunde aurreko kanpainan Astigarragako alkategaiak publikoki esan, herri galdeketa bideratuko zuela gure herrian zabor bilketa sistema egokiena erabakitzeko, ezker abertzalearen aparatuak asmo onak zapuztu zizkion. Alkateari goitik etorri zaion agindua izan da atez atekoa Astigarragan jartzearena, eta ez aukera».
Gaineratu du, oposizioan dauden udal ordezkariek kezka haundiz jarraitzen dutela udal gobernuak erabaki dituen inbertsio eta gastuen «zerrenda luzea». «800.000 eurotik gora bideratu dira atez atekoa martxan jartzeko. Konparazio baterako, herriko ikastolak aurten behar duen obra haundiari aurre egiteko adina diru. EAJ-PNVko zinegotziok ez dugu ulertzen Bilduren jarrera, kosta ala kosta, atez atekoa jartzearena, inposatzearena».
Herritarrei bizkarra
Arazoa ez dela atez atekoa bera nabarmendu du, «baizik eta Bilduk egin duen modua; herritarrei bizkarra emanda, bere gertukoei men eginez, baina gainontzekoak, herritarren gehiengo haundiena, gutxietsita». Eta argi utzi du, nahiz eta bosgarren edukiontziaren alde agertu, auzi honetan, herri galdeketa egitearen aldeko zirela eta direla. «Gure alderdiak zabor bilketa sistema aukeratzerakoan, herritarren hitza errespetatzeko borondatea erakutsi zuen. Gehiengoaren borondatez, atez atekoa aukeratua izan balitz, erabakia onartuko genuen. Bilduk erraz zeukan hainbeste aldarrikatzen den ‘herriari, herritarrei hitza eman’ benetan gauzatzeko. Baina Bilduk beste interes batzuen alde egin du. Eta inposaketa justifikatzeko, ipuina asmatu du».
Besteak beste, Garbitaniak sortzen dizkien zalantzak ere aipatu ditu: «Hernani, Usurbil, Oiartzun eta Astigarragako herritarrok ari gara sozietate publikoa ordaintzen. Zergatik jaso behar ditu Garbitaniak gure hondakinak? Zergatik egin da Astigarraga Garbitaniako sozio? Zergatik erabaki du Oiartzunek Garbitaniatik ateratzea? Zergatik erosi behar dizkio Astigarragako udalak akzioak Oiartzungo udalari?».
Urteurrenaren bueltan, etsipenaz hitz egin du: «Asteazkenean, apirilaren 2an bete zen atez atekoarekin daramagun lehen urtea. Astigartarrok resignazioz hartu dugun urteurrena. Resignazioz bai, alkateak eta bere gobernu taldeak erakutsi baitigute astigartarrok ez dugula ezer pintzatzen, Astigarragari dagozkion erabakiak ez direla Astigarragan hartzen».