Udal gobernu taldeak urtebete honetako datuak eman zituen asteazkenean, prentsaurrean, eta balorazioa ere egin zuen. Andoni Gartzia alkateak azaldu zuen Astigarragak hondakinen bilketari iraulia eman diola eta emaitzak harro egotekoak direla: «Atez Atekoa martxan jarri aurretik, Astigarraga ez zen hondakinen %30 gaika jasotzera iristen eta azken urtebete honetan, ez dugu hilabeterik egin %80ko gaikako bilketaren azpitik. Bene-benetako iraulia, urtebetean lortutakoa».
Guztia, herritarrei eskerrak izan dela azpimarratu zuen: «Herritar bakoitzak egin duen esfortzu txikiari esker izan da, herritar guztiek izan duten jarrera eredugarriari esker. Zorionak eta eskerrik asko!».
Normaltasuna ere aipatu zuen: «Martxan jarri aurretik zabaldutako beldur, gezur eta manipulazio interesatuen ondorioz, urduritasuna nabaria zen, baina behin martxan jarrita, guztiok konturatu gara herria ez dagoela zikinagoa, arratoiek ez gaituztela jan eta herritarren gehiengo zabala inolako arazorik gabe egokitu dela sistema berrira. Ondo baino hobeto ari gara».
«Astigartarrek asko bereizteaz gain, oso ondo bereizten dute»
Bi sistemetako datuak konparatuta, alde nabarmena organikoaren eta errefusaren emaitzetan dagoela azpimarratu zuen: «2012tik 2013ra eta lehenago, gure hondakinen %70a zabortegira bidaltzen genuen eta gaur egun, %17a besterik ez».
Ontzi arinen karakterizazioan, inpropioen bataz bestekoa %4,28 izatea oso datu ona dela adierazi zuen: «astigartarrek asko bereizteaz gain, oso ondo bereizten dituzte hondakinak».
Bosgarren edukiontzia aurrerapausoa izan arren, erdibideko soluzioa besterik ez dela gaineratu zuen. Urnietako datuekin konparatu zituen Astigarragakoak: «Organikoan, Astigarragak 97kg/bizt./urtean jaso ditu bataz beste eta Urnietak, 39kg/bizt./urtean. Errefusaren bilketan ere diferentzia nabaria da. Urnietan biztanleko 208 kg jasotzen den bitartean, Astigarragan herritar bakoitzari 112 kg jasotzen zaizkio».
Emaitzak hobetu, lanpostua sortu eta tasak mantendu
Atez ateko sistema ez dela garestiagoa azpimarratu zuen: «Bi sistemekin datu paretsuak lortu ditugu. 2013an, trantsizio urtea izanda, kostu gehigarriak izan ditugu lehenengo 3 hilabeteetan, hondakinen %70a zuzenean zabortegira bideratzeagatik. 2014 urtea izango da atez atekoarekin osorik egingo dugun lehenengo ekitaldi ekonomikoa eta defizita %36a izango dela aurreikusten dugu». Eta gaineratu zuen: «Iraganean, defizita murriztearen zama herritarren gain utzi da tasak igota. Atez atekoarekin, emaitzak hobetu ditugu, kalitatezko 5 lanpostu berri sortu, eta tasak mantenduta, zerbitzuaren defizitari eutsi diogu».
Poztasuna ere adierazi zuen gero eta gehiago ari direlako autokonposta egiten.