indiako Kerala herrian izan da Luis Intxauspe alkatea, bertako herritarren partaidetza eredua gertutik ezagutzen. Astearteko Plenoan bidaiaren arrazoiak eta nondik norakoak azaldu zituen.
Aurretik abisatu ez izanaren zergatia azaldu zuen lehendabizi: «joan den urtean Diputazioak partaidatzaren inguruko jardunaldiak antolatu zituen. Bertan izan zen Marta Harnecker, partehartzean adi-tua; ponentzia bat eman eta Gipuzkoako egoera ezagutu zuen. Aurten Indiako Kerala herrira bidaia bat zuen aurreikusia Haleckerrek, bertako partaidetza prozesua ezagutu eta konferentzia batzuk emateko. Diputazioari gonbitea luzatu zion eta erabaki zen hiru ordezkari joatea: bi Diputaziokoak eta bat herrien ordezkari gisa. Azken hau Beasaingoa izatea erabaki zen. Azken orduan ordea, Diputazioko ordezkari batek huts egin eta Hernaniri eskaini zioten. Bat-bateko erabakia izan zen, berehala erabaki beharrekoa, eta hori izan da aurretik ez azaltzearen arrazoia»
«Udalarentzat 480 euroko kostua izan du»
Keralan ikusi eta ikasitakoaren berri eman zuen ondoren Alkateak. Bertako eragile politiko, sozial, emakume talde, auzo elkarte... eta abarrekin elkarrizketatu zirela azaldu zuen, eta baita ere Harneckerrekin batera, prozesua bertatik bertara ezagutu zutela: «Bertan lantzen ari diren partehartze prozesua oso interesgarria izan da Hernanirentzat. Bertatik ezagutu izana baloratzekoa da, bertan lantzen ari baitira guk hemen landu nahi duguna. Partehartze Batzordean auzo elkarteekin egiten ari garen lana esaterako, ildo horretatik dijoa».
Bidaiaren kostuaren gaiari ere heldu zion alkateak: «bidaia eta hotelaren gastuak Diputazioak ordaindu ditu. Bertako otorduak eta garraioa gure kontu izan dira. Eta itzultzaile bat ere kontratatu genuen. Hernaniko Udalarentzat, guztira, 480 euroko gastua izan da».
Oposizioak prentsan ateratako oharren inguruan ere aritu zen Alkatea, eta tonoa eta modua ez zaizkiola egokiak iruditu gaineratu zuen: «Prentsan, PSE-EEk zioen munduko beste puntara joan behar al den partehartze eredu bat ezagutzera. Gure erantzuan da: bai. Justu Keralan lantzen ari diren partehartze prozesua baita interesgarria Hernanirentzat. Udalak aurrera daramazkin partehartze prozesuen inguruan PSE-EEk galdetutakoaren harira, esan behar dugu baietz, bai legegin-tzaldi honetan eta bai aurrekoetan ere, izan direla parte hartze prozesuak: kirol instalazioak, gazte lokalak, ikastetxeetako patioak, auzo elkarteak...» Morcillok erantzun zuen interesantea izan daitekeela bidaian ikusi eta ikasitakoa, baina gizarte Indua, kastak, ez datozela bat garapenarekin: «espero dugu han ikasitakoa hemen praktikan jarri ahal izatea, nahiko nuke! Baina gure ustez, ez da modelo egokiena».
EAJk prentsan Indiako demokraziari buruz esandakoen harira, Alkateak azaldu zuen Indiako Kerala Estatuko demokrazioa bat datorrela Gobernu Talde honek demokrazia ulertzeko duen ikuspuntuarekin: «oso garatua dute, Europako herri askok baina garatuagoa». Amonarraizek erantzun zuen, kasten arazoa ez dela oso demokratikoa: «herrialde hori erreferente iruditzen bazaizue zoragarri, baina guretzat ez da hala».
Kargu hartzea eta Karabelgo obrak ere, aztergai
Indiako puntuaz gain, beste zazpi aztertu zituen astearteko Plenoak. Karabelen Urumearen bueltan egin beharreko urbanizazio lanen ordena aldatzea adostu zuen Plenoak, aho batez. Orain, obren ordena izango da: zubia, errotonda eta lezoia. Bestalde, Bego Zuzak zinegotzi kargua hartu zuen.
Chillida-Leku, hizketagai
Chillida-Lekuren gaia nola dagoen galdetu zuen PSE-EEk erregistro bidez. Alkateak erantzun zion Diputazioak eta Eusko Jaurlaritzak hala adostuta, azken hau ari dela Chillida familiarekin tramitatzen. Udala ere prozesuan parte hartzeko prest dagoela badakitela azaldu zuen Alkateak, eta orain negoziazioa zertan dagoen jakin zain daudela.