Aretoa egokitu dute Astigarragako Musika Eskolan. Besteak beste, kortina batzuk jarri dituzte, eta inaugurazio moduan, festa antolatu dute, ostiralean. Kontzertu berezi bat eskainiko dute eskolako ikasleek. Arratsaldeko 19:00etatik aurrera, honako taldeek joko dute: biolin bikotea, Ilargian, pandero taldea, Dobat, Ibon, Xabier eta Alfredo, Betak, Eira, 7 t’erdik, Ttakun eta Iratzar abesbatza.
300 ikasle, adin tarte guztietan
Norberto Almandoz Musika Eskola 1994an sortu zen. Urtetik urtera, indartzen joan da eta gaur egun, 300 ikasle ditu, 13 irakasle eta zerbitzuetarako 2 pertsona. Irati Zabala arduradunak Kronikari azaldu dioenez, edozein adin tarteko herritarrentzat eskaintzen dute zerbitzua. Alde batetik, 0-3 urtekoentzat tailerra dago (inguruko herrietan ez da halako zerbitzurik). Haurrak gurasoekin joaten dira eta musikaren inguruan gauza desberdinak lantzen dituzte: psikomotrizitatea, “dantza”, soinu desberdinak ezagutzen ikasi, imitatu, entzumena landu, ahotsa...
Bestetik, 4 urtetik gorakoentzako klaseak daude. Adin horretatik aurrera, guraso gabe egoten dira klaseetan. 4-6 urte bitartean, tailerra izaten da, ez dute instrumenturik jotzen. 7 urtetik aurrera aukeratzen dute ze instrumentu jo.
Igande honetan, eguerdi partean, AHIT haize instrumentu taldea herriko kaleak girotzen ibiliko da.
Lau maila
Denera, 4 maila daude eta lehenengo mailan 0-6 urtekoak egoten dira. Bigarren mailan, 7 urterekin hasten dira eta ez dago adin zehatzik noiz bukatu. Instrumentuarekin maila egoki bat hartu arte izaten da. Gero, hirugarren mailan sakondu egiten dute, eta baita laugarren mailan ere.
Instrumentu ugari
Musika Eskolan instrumentuak ikasteko aukera ederra dago: gitarra, txistua, akordeoia, trikitixa, panderoa, klarinetea, saxofoia, tronpeta, pianoa, organoa, zeharkako flauta, biolina, biola, gitarra elektrikoa, baju elektrikoa, bateria… Azken urteetan modan daudenak gitarra, pianoa eta bateria direla azaldu du Zabalak. «Herri honetan trikitixak ere zaletu asko izan ditu, baina azken boladan jaisten ari da», gaineratu du.
Jaioberrientzako eta haurdunentzako saioak
Musika Eskolak beste zerbitzu berezi bat ere eskaintzen du: 0-1 urteko haurrentzat eta haurdunentzat tailerra. Gurasoentzat eta haurrentzat oso onuragarria dela dio Zabalak eta animatzeko dei egiten die ume jaioberriak dituzten edo haurdun dauden herritarrei.
Ikasle finak
Musika Eskolatik ateratako hainbat ikaslek Musikenen, Euskal Herriko goi mailako kontserbatorioan jarraitu dute ikasketak egiten, eta bukatu ere bai. Iaz, 3 ikasle hasi ziren Donostiako erdi mailako kontserbatorioan ikasten. Eta piano irakasle lanetan dabilenik ere bada, Gasteizko erdi mailako kontserbatorioan.