( Jexux Eizagirre Portillo )
Pertsona askok erakutsi didate asko. Haietako bat: alzheimer gaitzaz joan zait (gezurra: ezin dut burutik kendu). Eta, erakutsi handiena eman zidan, gaitza (borragoma baten antzera) memoria jaten hasi zitzaionean: borragomak auto-zentsura (norberaren gezurrak) jaten du lehenik: orduan, azaltzen dira norberaren ezkutuko egiak.
Don Quijote, eroa omen. Ba, Don Quijote eroari esker, arrazoi handiagoz idazten dut euskaraz.
Baina, behar bada, erakutsirik zailena, pertsona desgaitu batek eman dit. Gabezi latza du: hanka bat falta. Baldar dabil zurezko hankaz, eta makuluaz. Baina, kontuz. Ez errukitu! Gizatxarra da. Koldarra. Gezurteroa. Ez du lagunik. Haren itzalak berekin sortuko dizu izua, eta ikara. Long John Silver pirata maltzurraz ari naiz. Jo ezazu Altxorraren uhartea, eta hantxe egingo duzu topo, bere loro berdea bizkarrean duela. Atzo bertan, pirata maltzurrak labanaz pasa zuen koadrilako bat. Ordea, oraintxe bertan, pirata maltzurrari bihotza beratu zaio, Jim Hawkins (mutikoa) istilu gorrian ikusi duelako. Eta, pirata maltzurra kapaz da, bere burua urkan galtzeko, mutikoa salbatze arren. Gero, berriro ere, bere betiko trapukerietara itzuliko da: batere ez harritu, Hernanin ikuste baduzu pirata hankabakarra, zebra-bide erdian bere autoa aparkatzen, amona-xaharrei enbarazu egite aldera. Baina, mutikoarekin beti jator portatuko da.
Mundua ez da ´oesteko` pelikula: txintxoa, beti txintxo (eta pintxo); eta maltzurra, beti maltzur (eta zatar). Errealitatean egia eta gezurra nahasturik daude: ´Oilo beltzak, arrautza zuria; gezurrak, tartean, egia`: ez da media txarra: telebistako informatiboen parekoa.
Egunero irensten ditugun informatibo gehienak, buru bakarren batek manipulatzen ditu. Hark ere loro bat du bere mende (Long John Silver-ek bezala): ´mikro` baten aurrean dagoela, beste alderik ez. Krisiak, guztiaren gainetik, egia jo.
Jexux Eizagirre Portillo