´Ez nazala ezerk, zu gandik urrundu`

( Jexux Eizagirre Portillo ) Ez dago urruti. Oinez, 10 mi­nutu, plazatik. Terrenoz, futbol zelai-erdia. Atea zeharkatu, eta... bidai luze bat egin du­gu, antza; eta, nonbait, oihan ma­giko batean gaude: pal­mon­do, mizpira japoniarra, Bir­maniako garo, Hima­laia­ko zedro... Putzu bat ere ba­da: arrain-gorri sinpatikoak; eta, inoiz, igel despitatu bat, dzanga uretara salto egiteko prest. Parke Botanikoan zehar noa, ttappa-ttappa. Urtaro bakoitzak bere kolorez zipriztintzen du parkea: atzo, sanjose lorez. Nik oso gustuko dut Ginkgo Bilobak, urrian, hartzen duen urregorri kolorea, eta Her­ku­les arbolak erakusten duen... Polifonikoa ere bada parkea: han entzungo diozu, txan-txan, txantxangorriari; edo txor-txor, zozoari; edo txio-txio... edo mee, larreko ar­­diari; edo irrintzi, mendiko behorrari; edo kukurruku, ba­se­rriko oilarrari... edo angu, titia har­tzen ari den jaioberriari... Hego-haizeak ere bere mu­sika (pir-pir) aterako die zuhaitzei, dardara eragitean. Udan, zunburruntxoa ere en­tzungo diezu eltxoei... Kulinarioa ere baduzu parkea. Zuhaitz-hostoak bi es­kuez igurtzi, eta hainbat za­pore dastatuko duzu. Erei­no­tza usaindu, eta plater txina­­tarra dastatuko duzu. Izeia gorria usaindu, eta perfume garestia adituko... Mexikoko altzifrea usaindu, eta urtetan barriketan ondutako ardoa... Sanatorioa ere baduzu... Pinu tantaiak dituzu, errenkan. Haien azpian paseatuz, birikak berritu egingo zaizkizu... Parkean baduzu, gainera, toki bat energetikoa. Eserleku bat. Bankua, egurrezkoa... Ez­ker-eskuinez palmondo bana ditu: itzalean duzu zain, esaldiz josita... Energia positiboak irteten dizu, esaldi bakoitza irakurtzean. Guztien gainetik, fusibleak ere erre egingo dizkizu batek: ´Ez nazala ezerk, zu gandik urrundu`. Juramentu hori bankuak berak egin zion parkeari, San Joan gauez, ilargitan, zoli-zoli; eta, gero, bihotz gazte batek kopiatu, akats ortografiko eta guzti.