Maixa Ruiz - On Bit informatika
«Denda guztiek betetzeko moduko baldintzak dira eta denak animatuko nituzke»
«Iñigok, Berriak elkarteko dinamizatzaileak esan zigun kalitatearen oinarrizko ziurtagiria lortzeko aukera zegoela eta animatzeko. Animatzea erabaki genuen eta 6 orduko ikastaro bat jaso genuen. Ikasi genuen tramiteak nola egin behar ziren eta ondoren formakuntzako kide bat pasa zen dendatik, zer falta zen esateko. Irteerako kartela jarri behar nuela esan zidan, besteak beste. Ondoren inspektorea pasa zen. Oso oinarrizko baldintzak dira eskatzen direnak, denda guztiek betetzeko modukoak eta denak animatuko nituzke ziurtagiri hau ateratzera», dio Maixa Ruiz On Bit informatikako jabeak. Ikasteko balio izan diola azaldu du eta jarraitzeko asmoa du.
Arantxa Landaribar - Portalondo estankoa
«Ziurtagiri honekin bezeroak ikusi dezake dendaria saiatzen dela
ahalik eta ondoen atenditzen»
Arantxa Landaribar Portalondo estankoko jabeak ere, Berriak elkarteak bultzatuta egin zuen ziurtagiria lortzeko eskaera. «Ni naiz hemengo zaharrena, eta ni animatu nintzen», gaineratu du. «Beti daude hobetzeko gauzak eta honek ere ikasteko balio izan du. Esaterako, inkesta bat egin behar izan genien bezeroei, gure zerbitzuarekin gustora zeuden jakiteko eta oso interesgarria iruditu zitzaidan». Bete beharreko baldintzak oso oinarrizkoak direla azaldu du eta horiek lehendik ere kontuan izaten zituztela, «denda txukun izan eta bezeroari traturik onena ematea, batez ere». Bezero gehiago izateko ez duela balioko uste du, «baina bai oraingo bezeroek ikusteko dendaria saiatzen dela ahalik eta ondoen atenditzen».
Jose Antonio Torres - Torres argazki denda
«Ikastaro hauekin asko ikasten da; norberarengan konfiantza gehiago izaten, esaterako»
Torres argazki dendak, 2008an lortu zuen Kalitatezko Q Ziurtagiria. Bere iniziatibaz egin zuen eskaera Jose Antonio Torresek, Hernaniko beste bi dendekin batera. Ziurtagiria berritu egin behar da hiru urtetara eta aurten berritu du, «arazorik gabe». Orain, oinarrizko ziurtagiritik haratago joan nahi du eta beste pauso bat eman du. Bikain Ziurtagiria lortzeko lanean ari da. Oinarrizko mailatik sekulako aldea dagoela azaldu du eta zaila iruditzen zaio ziurtagiria lortzea. Dena dela, oso pozik dago ikasten ari denarekin. «Maila psikologikoan, inteligentzia emozionalean oinarritzen dira kasu honetan. Hori lantzeko ikastaroetan nabil eta oso interesgarriak dira. Ikastaro hauekin asko ikasten da; norberarengan konfiantza gehiago izaten, esaterako, eta horrek eragina du».
Merkalitatea ZiurtagiriaUNE 175 001 araua:
1.- Zerbitzuari dagozkion baldintzak:
Kortesia: bezeroenganako adeitasuna, zintzotasuna, arreta eta errespetua.
Sinesgarritasuna: dendariek bezeroei erakutsitako prestutasuna eta zintzotasuna medio.
Erantzuteko gaitasuna: azkartasuna eta efikazia bezeroen beharrak asetzen.
Bezeroa ulertzea: bezeroen beharrak identifikatzeko gaitasuna.
Fidagarritasuna: zerbitzua arazorik gabe eskaintzeko gaitasuna.
Komunikazioa: salmentari eta dendari buruzko informazioa emateko gaitasuna.
Segurtasuna: bezeroarentzat kaltegarriak izan daitezkeen arriskurik ez izatea.
Akzesibilitatea: denda aurkitzeko erraztasunak izatea eta baita sartzeko eta bertan mugitzeko ere. Dendariak, produktuak eta informazioa eskura izatea.
2.- Materialari dagozkion baldintzak:
Instalazioak: eskaparatea, salmenta gunea, biltegia...
Ekipoak eta altzariak: beharrezko elementu tekniko guztiak izatea; hala nola, kutxak, datafonoak, hozteko kamarak, mostradoreak, apalak, bitrinak...
Ontziak eta enbalajeak
Erosketa dokumentuak: erosketa tiketak, fakturak, albaranak...
Produktuak: dendan salgai dauden artikulu guztiak.
3.- Langileei dagozkien baldintzak:
Irudia: langileek transmititzen dutena.
Langileen lehiakortasuna: salmentarako beharrezkoak diren ezagutzak izatea.
4.- Hobekuntza:
Bezeroak pozik mantentzeko eta emaitzak hobetzen joateko, zerbitzua aldiro hobetzeari garrantzia ematea.