Gipuzkoako Txapelketara begira daude bertsolariak, eta asteburu honetatik, jokoan izango dituzte sailkatzeko kanporaketak. Astigarragan izango dira aurreneko saioak, larunbat honetan: goizeko 11:30etan bat, eta arratsaldeko 17:30etan bestea.
Hernaniarrik ez da ariko bertan, baina asko dira kanporaketa lehiatuko dutenak: Iker Osa eta Asier Azpiroz Idiazabalen, igandean 11:30etan; Eñaut Martikorenak ere igandean dauka saioa, Oiartzunen 17:30etan; Iñaki Zelaia Antzuolan, maiatzak 16an 11:30etan, eta Eli Pagola 17:30etan; Arnaitz Lasarte eta Unai Gaztelumendi Hernanin, maiatzaren 17an 11:30etan; eta Oier Iurramendi ere Hernanin, egun berean 17:30etan.
Bi saio, Sandiusterrin
Guztira, 24 saio izango dira, eta 12 herritan jokatuko dira. Hernanin, maiatzaren 17an jarri dute zita. Bi saio izango dira, Sandiusterrin: goizeko 11:30etan aurrenekoa, eta arratsaldeko 17:30etan bigarrena.
Sarrerak bertan salduko dira, goizeko 10:00etan eta arratsaldeko 16:00etan. 6 euro izango dira; 16 urtetik beherakoek 4 euro.
30 bertsolari, txapelketara
74 bertsolarik hartuko dute parte kanporaketa honetan, eta 30 sailkatuko dira Gipuzkoako Txapelketara. Bakoitzak bi saiotan kantatuko du.
Txapelketa irailean hasiko da, eta dagoeneko zain daude 13 bertsolari, zuzenean sailkatuak, tartean zenbait hernaniar eta Hernaniko bertso eskolan aritutakoak: Unai Agirre, Agin Laburu, Jexux Mari Irazu eta Beñat Gaztelumendi.
Epaile lanetan ere, ariko dira hernaniarrak, kanporaketan: Amaia Otxotorena eta Bakarne Urreaga.