Massachussetsen, Bostongo Toro jatetxean izan berria da Petritegi sagardotegiko Ainara Otaño, Txetxu Mujikak eta Ramon Bareak lagunduta, Shacksbury Basque Cider sagardoa aurkezten; Petritegik Ameriketako Shacksbury enpresarentzako egiten duen sagardoa.
Ekitaldian, ezagutzera eman zituzten euskal sagardoa eta honen kultura. «Amerikarrek garrantzia haundia ematen diote proiektu baten atzean dagoen filosofiari», azaldu du Otañok. Estatu Batuetan sagardo aparduna eta gozoa edaten badute ere, «geroz eta gehiago dira bestelako sagardoak eskatzen dituztenak, kalitatezkoak, historia eta oinarri sendokoak. Euskal sagardoak leku bat badu hor».
Ekitaldia txotx eginez bukatu zuten, eta Song of the Basques dokumentala ikusteko aukera ere izan zuten; Emily Lobsenz zinegile estatubatuarrak sortua, Euskal Herrian bizi zela ezagututako euskal ohiturak biltzen dituena.
Kantu afaria, hilaren 15ean
Bestalde, maiatzaren 15erako kantu eta bertso afaria antolatu da Petritegin. Unai Agirre eta Aitor Mendiluze ariko dira bertsotan, eta Musika Eskolako irakasle eta ikastolako guraso talde bat, giroa jartzen. Txartelak salgai daude, 35 eurotan, Petritegi sagardotegian, Petri tabernan, 943 45 71 88 telefonoan edo: bapokantari@gmail.com.