Orain dela bi hilabete, galdutzat ematen zuten askok Hernanik ohorezko mailari eustea. 14 partidu jokatu, eta bakarra irabazi. Getxoren aurka, bigarren garaipena lortu zutenetik ordea, puntuak bilduz joan ziren trikoloreak, azken zortzi partiduetatik, bost irabaziz. Eta atzoko garaipenarekin errematatu zuten denboraldia. Hil ala biziko partidua zuten Bartzelonaren kontra; irabazi beharra baitzuten mailari eusteko. Eta ez zuten nolanahi lortu garaipena.
Lehenengo zatian lehia estua izan zen. Etxekoak urduri atera ziren eta baloi argi batzuk galduta, atzetik iritsi ziren atsedenaldira: 12-14. Bigarren zatian, ordea, minutu gutxira jarri ziren aurretik Genuaren zigor kolpe bati esker, 15-14, eta partidua bukatu arte, nagusi izan ziren. Emaitza: 35-14. Bost entsaio egin zituen Hernanik eta bonusa ere lortu zuen.
Zaleen laguntza ederra ere izan zuten atzo trikoloreek. Giro bikaina izan zen Landaren. Herritik eta kanpotik, 1.400 lagun inguru gerturatu ziren.
Laugarren urtez, ohorezko mailan
Laugarren urtez, ohorezko mailan izango da Hernani. Gustora ziren atzo jokalariak, elkarteko kideak eta zaleak. Rafa Larretxea taldeko arduradunak halaxe azaldu zion Kronikari: «Orain dela bi hilabete, zuzenean ez jaistea zen helburua. Eta azkenean biak lortu ditugu: zuzenean ez jaistea eta promozioa ez jokatzea. Orduan inork ez zuen espero. Beste urtebetez goi mailan egongo gara, laugarren urtez jarraian. 50 urteurrena ospatzen ari gara gainera, eta gure filosofiari eutsiz».
Hernanik 10garren postuan bukatu du denboraldia. Vigok galdu egin zuen eta bera jaitsiko da mailaz. Bartzelonak jokatu beharko du promozioa.