Gaur, Maiatzak 1, mobilizazioak deitu ditu LABek Euskal Herri osoko eskualde desberdinetan. Eta Buruntzalde mailakoa, Hernanin egingo da. LABek dei egiten die langile guztiei kalera ateratzeko gaur: «Askoz ere emankorragoa da langileak eta langileon aldarrikapenak plazara ateratzea, Euskal Herriko eskualde guztietan ikusgarriak egitea, Maiatzaren Lehenean langileok mobilizatzen jarraitzen dugula ikustaraztea».
Manifestazioa eguerdiko 12:00etan abiatuko da Plazatik, Langileok borrokan, Euskal Herriak aldaketa lemapean.
«Euskal gizarteak hartu behar ditu bere erabakiak»
EH Bilduk dei egiten die herritarrei gaurko mobilizazioetan parte hartzeko. Hala azaldu du: «PPk Madrildik inposatu dituen politika neoliberalek eta EAJk eta UPNk txintik esan gabe onartu dituzten neurri atzerakoiek eragin dute urteetako borrokaren bidez lortutako eskubide sozial eta laboralak deuseztatzea».
EH Bilduk bestelako neurri eta politiken alde egiten duela dio: «Gure arazoei adarretatik heltzeko eta erabakiak guk geuk hartzeko ordua da. Herritarrok izan behar gara herri honek behar duen eredu ekonomiko eta soziala zein izan behar den erabaki behar dugunak. Herritarrok izan behar gara bizi eta lan kalitate duinak ezartzeko baldintzak jarri behar ditugunak. Pobrezian bizitzera kondenatzen gaituzten Madrildik eta Europatik datozen inposizioen aurrean, EH Bildutik bestelako bidea hartzea proposatzen dugu: euskal gizartea izan behar da bere erabakiak hartu behar dituena. Argi eta ozen diogu: dena erabaki nahi dugu, dena aldatzeko». Eta eskubide sozial eta laboralak berreskuratzeko, borroka egin behar dela dio kalean, lanean eta instituzioetan. «Duintasuna berreskuratzeaz hitz egiten ari gara».