Astearteko Plenoan hasierako onarpena eman zitzaion 2015eko aurrekontuan kreditu aldaketa egiteari. Hau da, 2014ko aurrekontuko gerakinetik (aurrezkia), 1.800.000 euro inbertsioetara bideratzea proposatu du Gobernu Taldeak eta horrek aldaketa eragin du 2015eko aurrekontuan. Honako proiektuak eramango lirateke aurrera, diru horrekin: Urumea ikastolako patioa estali, Langileko jangela haunditu, hezkuntza digitala, Errugbi elkarteari laguntza 50 urteurrena dela eta, gazteriari begira etxebizitzen alokairurako dirulaguntzak haunditu, Etxeberri auzoko bigarren urbanizazio fasera, bidegorri sarea haunditzea, AMHERekin hitzarmena haunditu… Apirilaren 18an eman zituzten azalpenak prentsaurrean.
Gobernu Taldeak alde bozkatu zuen, EAJ-PNV abstenitu egin zen eta PSE-EEk kontra bozkatu zuen.
Prentsan zabaldutako edukiekin, eztabaida
Gai honek eztabaida sortu zuen Gobernu Taldearen eta oposizioaren artean.
Oposizioak prentsan zabaldutako datuen eta iritzien inguruan hitz egin zuen Aitor Miner ogasun zinegotziak. EAJri erreferentzia eginez, Bilduk kajoian 3.400.000 euro gordeta dauzkala esatean, ez dela zuzen ari nabarmendu zuen: «Maiatzeko, urriko eta azken otsaileko plenoetan egon dira berri emateak eta ez duzue ezer esan. Ogasun batzordera ez zineten azaldu, beste batzorde askotara bezala. Datuak nondik ateratzen dituzue? Nahita ematen dituzue datu okerrak edo bestela ez duzue piperrik ulertzen», adierazi zien oposizioko kideei.
Andoni Amonarraiz EAJko bozeramaileak erantzun zuen kontuhartzailearen datuekin eta udaletxean jasotako azalpenekin, bere iritzia eman besterik ez duela egin: «Nik 3,4 milioiko gerakina dagoela ikusten badut, horixe esaten dut. Zuk irakurketa partidista egiten duzu. Eta Batzordea izan aurretik, prentsaz enteratu ginen 1.800.000 euro nora bideratuko ziren. Ez zitzaigun aurrez azaldu eta jokaera elektoralista izan da, argi eta garbi. Ez zaigu gustatzen zuen lan egiteko modua, eta horixe esan dugu».
Luis Intxauspe alkateak erantzun zion oposizioaren joku politikoa zein den ikasi dutela eta hori dela gustatu ez zaiena: «Zuen joku politikoa ez dago hemen, ez batzordeetan; prentsan dago. Batzordeetan isilik egoten zarete, eta gero, hurrengo egunean, prentsan argitaratzen duzue zuen iritzia. Ikasi egin dugu eta aurrea hartu dizuegu kasu honetan. Gainera, batzordeko deialdiaren berri bazenuten».
Minerrek gaineratu zuen lau urteetan erabilitako kriterio berarekin aritu direla aurten ere, baina aurtengo emaitza hobea izan dela. «Hori da kontua, espero baino diru sarrera haundiagoak izan ditugulako 2014an, eta gastuaren jarraipen zorrotza egin dugulako. Lau urte hauetako lanaren emaitza izan da. Hori horrela, gehiago bideratuko da inbertsioetara. Eta ez da hauteskunde urtea delako».
Sozialistek ere eman zuten beraien iritzia gaiaren inguruan: «Ez zaigu ondo iruditu prentsaren bidez zabaltzea berria horrela, gurekin kontatu gabe, eta guk gure iritzia besterik ez dugu eman ondoren prentsan».
Beste hainbat puntu
Kale garbiketa zerbitzuaren kontratua beste urte betez luzatzea onartu zen. Musika eskolako barne araudia ere bai, zaharkitua baitzegoen. AMHEReko hitzarmena ere egokitzea onartu zen. Hitzarmen honen bidez, 6.000 euro gehiago bideratuko ditu Udalak elkartera. Denera: 40.800 euro. Lankidetzara, %0,79 (190.000 euro) bideratzea onartu zen. Eta baita Gaztematikarekin lotuta, lan proposamena ere.