EAJ-PNV eta Hamaikabat alderdiak kritiko azaldu dira, Udalak eskatuta, Euskal Memoria Fundazioa egiten ari den txostenarekin, indarkeria politikoaren inguruan. Halaxe azaldu dute: «Hernanin izan diren indarkeria ekintzen erregistroa egitea oso ondo dago. Hala ere, aurrez badira pare bat kontu landu eta zuzendu beharko liratekeenak. Zehazki, zergatik ez da eztabaidatu azterketaren inguruan, kontratatu aurretik? Zergatik adjudikatu zaio ikerketa hau zuzenean Euskal Memoria Fundazioari?».
Bi alderdiek adierazi dute ez dutela konfiantzarik Euskal Memorian. «Fundazio hau osatzen dutenak ezker abertzaleko kideak dira eta demostratu nahi dute jarraipen historiko bat dagoela euskal herriaren auzi nazionalean eta ETAren terrorismoaren artean. Guk hori sustraietik ukatzen dugu», diote.
Eta gaineratu dute: «Ze konfiantza izan dezakezu ezker abertzalearen organismo batean, honek ardura historiko zuzena duenean, azken hamarkadetako indarkeriaren (hilketak, bahiketak, estorsioa, kale borroka edo persekuzio politikoa) justifikazio eta babes ematearen inguruan?».
Euskal Herriaren kontra izandako indarkeria politikoaren azterketak (1936tik gaur egunera arte) legitimoa ez dena ezin duela legitimatu nabarmendu dute: «eta gure ustez, azterketa honek akats bat du oinarrian».
«Iturriak alde batekoak dira»
Azterketak «hutsune deigarri eta larriak» dituela ere azaldu dute, «indarkeria ekintza berrienei dagokienez. Erabilitako iturriak alde batekoak dira, eta ezker abertzalearekin lotutako komunikabideetan oinarritzeko joera dute, iturri ofizialei kasorik egin gabe, ezta Hernaniko Udaltzaingoari ere».
Eusko Jaurlaritzaren lanketari egin die erreferentzia: «Honelako azterketa bat egiteko, Eusko Jaurlaritza egiten ari den azterketa kontuan hartu behar da eta konparaketak egin. Eusko Jaurlaritza azterketak egiten ari da, terrorismoa, indarkeria poliziala, torturak edo estorsioa jasan duten biktimen inguruan.