Scat izeneko diskoa kaleratu berri du Ainara Ortega abeslari eta musikari hernaniarrak. Ortegak hamabost urte daramazki musikan, profesionalki, eta aurretik lan ugari eta desberdinetan aritu izan den arren, «hauxe da neronek pentsatu, sortu eta gorpuztutako proiektua», azaldu dio Kronikari.
Berak moldatutako kantuak dira denak eta konposatutakoak ere bai, bi (euskeraz eta gazteleraz). Lau hizkuntzatan abestu du: «ohikoak zaizkidan lau hizkuntzatan, ez da bete-lana egiteagatik izan», nabarmendu du.
Ortega, jazz kantaria da eta harro dagoela dio, baina disko honetan badira bestelako estiloak ere, «pop kutxukoagoak, samba bat edota musika klasiko pixka bat».
Diskoaren izena nondik datorren ere azaldu du: «Scat hitza, ingelesez eta jazzaren munduan oso ezaguna da. Abeslari edo bokalistek bat bateko soloa egiteko edo inprobisatzeko erabiltzen dugun teknika da».
Bost musikari eta «luxuzko gonbidatua»
Scat proiektuko musikariak hauexek izan dira: Iñaki Salvador (pianoa eta eskusoinua), Hasier Oleaga (bateria), Javier Mayor (kontrabaxua), Mikel Andueza (saxoak) eta Baptiste Techer (tronboia). Kantu batean, «luxuzko gonbidatua» ere izan duela azaldu du Ortegak: «Amaia Zubiria; nere ustez gutxi xamar eskertu izan diogun kantaria eta azken urteetan, telebistako “talentuen” saioak direla eta, besteak beste, ahaztutako ezinbesteko abeslaria».
Lau puntutan, salgai
Hernanin, lau puntutan erosi liteke diskoa: Txantxilla kafetegian, Kixkal tabernan, Guria tabernan eta Antziola kafetegian.
Bideopromoa, hemen.