La Caixak Karabeleko ekonekazaritza etxaldea saritu du «bere izaera sozial eta solidarioagatik», eta proiektua sendotzeko laguntza eta babesa eskainiko dio, Gizarte Ekintzailetza programaren barruan. Programa edo egitasmo horren helburua da inpaktu soziala bilatzen duten proiektuei babesa ematea; hain zuzen, ekonomia eta ingurumen arloetan jasangarritasuna ziurtatu nahi duten enpresa-ekimenei.
La Caixak Karabelekoren helburuak kontuan hartu dituela azaldu dute: «aitzindaria izatea baratzezaintzaren inguruko entsegu-lanean eta buruko osasun arazoak dituzten pertsonen bizi-kalitatea hobetzeko lan egitea».
Oier Iurramendi, Amaia Odriozola eta Javi Lopez dira Karabeleko bazkide-langileak. Iurramendik azaldu duenez, ez da erraza izan, baina oso pozik daude emaitzarekin.
Autonomia-erkidego ezberdinetatik 287 proiektu aurkeztu ziren eta horietatik 20 lagunduko ditu La Caixak. Ekimen guztiak orain gutxi sortutako gizarte-enpresenak dira. La Caixak, aukeratutako 20 proiektu horiei, laguntza ekonomikoa (25.000 euro), prestakuntza pertsonalizatua, enpresa kudeatzeko laguntza eta sareko lana eskainiko die.
Hainbat arlotan lanean
Karabeleko proiektua, 2013ko urrian sortu zen eta fisikoki, 2014ko urtarrilean ekin zion bere jardunari Portu eta Karabel arteko lurretan. Maiatzean, berriz, denda ireki zuten eta uztailean, kontsumo taldea jarri zen martxan.
Martxa onean doala dio Iurramendik. Alde batetik, buruko gaixotasuna dutenekin egiten dute lan, AGIFESekin elkarlanean. Denera, 30 lagun dabiltza terapian. Bestetik, presoekin ere aritzen dira, Iresgi elkartearen bidez. Eta Hernaniko ikastetxeetako ikasleekin ere aritzen dira, nekazaritza ekologikoa erakusten.
Horrez gain, ikerketa zentroa da Karabeleko. Kanpoko barazki barietateekin entsaioak egiten ari dira. Eta orain, ostegunetako azokan ere badute postua. Nekazaritza ekologikorako landareak saltzen dituzte.
Uholdeen ondoren, auzolana
Azken uholdeek kalte haundiak eragin zituzten Karabelekon. Pixkanaka lehengora bueltatzen ari dira eta auzolan deialdiari erantzunez, 30 lagunek eman zuten laguntza eskertu nahi izan dute.