Haundia egin zuen atzo Hernanik, ligako bigarren itzuli osoan bezala. Partidu bikaina jokatu zuten Altamiran, eta Ordiziari derbia kendu bakarrik ez, erasoko bonusa ere lortu zuten. Bost puntu, beraz, oraindik ere gorago begiratzeko aukera ematen diotenak.
Izan ere, Vigo gainditu badute, eta hiru puntu atzetik utzi, Bartzelona harrapatzea ere eskura daukate hirukoloreek, hiru puntu gainetik. Matematikak errazak dira, kasu honetan: Bartzelonaren kontra jokatuko dute azken partidua, igandean Landaren. Irabazita, zuzenean salbatuko da Hernani.
17 puntu segidan
Atzoko derbia oso berdinduta joan zen, 21-15 zirela Hernanik partzial erabakigarria lortu zuen arte: 17 puntu segidan, eta garaipena eta bonusa poltsikora.