Proposamenak egiteko azken astean sartu da Hernani Erabaki prozesua. Beraz, buruan daukan ideia bota ez duenak, egunotan dauka aukera. Horretarako bide bat, saio irekietan parte hartzea da. Gaur eta etzi egingo dira azkeneko biak.
Gaurkoa 19:00etan izango da, Gabriel Zelaia eraikinean (Florida auzoa, 28), eta gai jakin batzuei buruzko proposamenak bilduko dituzte: tokiko garapena, ingurumena eta natur baliabideak, hondakinak, energia, merkataritza, turismoa, eta lan eta enplegu eremua.
Etzi, berriz, 18:00etan izango da saioa, Plaza Feministan. Gaiak: parekidetasuna, kultur aniztasuna, lankidetza eta internazionalismoa, eta gizarte politika.
Buzoietan eta interneten, osteguna arte
Saioetara joaterik ez duenak, beste bide batzuk ere baditu, proposamenak aurkezteko: Biterin, udaletxean, kiroldegian, Goiz Eguzkin eta Institutuan jarri diren buzoietan utzita; edo www.hernani.eus.
Osteguna da azken eguna, eta herritarrak animatu dituzte parte hartzera.