Oihal puskaz beteko da Ave Maria parkea bihar, bigarren Udaberri Festan. Iaz giza katea egin bazuten, oihal kate moduko bat egingo dute aurten: bakoitzak apaindutako oihal puskak elkartu, oihal erraldoi bat osatu, eta kalejira ere egingo dute 12:30etan.
Baina beste ekintza ugari ere antolatu ditu Hernaniko Gure Esku Dagok, biharko festarako. Zazpi gune ezberdin izango dira, eta ekintza ugari, goizeko 11:00etan hasi eta arratsaldeko 17:00etara.
Hautestontzia eraikiko dute
Guneak zabaltzeko, nazioarteko pintxopotea egingo dute 11:00etan. Ondoren, kirol jarduerak izango dira, eta 12:30etan egingo dute ekitaldi nagusia: oihal kalejira, hautestontzia eraikitzea, eta Eskuetan flash moba.
Picnic herrikoi musikatua ere izango da, bakoitzak eramandakoarekin, 13:30etan.