23garrenez ospatuko dituzte Extremadurako Jardunaldiak Hernanin, asteburu honetan. Azken urteetako ildotik, ekintza ezberdinak antolatu dituzte, Extremadura bere osotasunean ekartzeko herrira.
Gaur arratsaldean emango diete hasiera jardunaldiei, zenbait bideoren emanaldiarekin. 19:30etan hasiko dira Biterin, eta horietan erakutsiko dituzte Extremadurako paisajeak, bailarak, hiriak...
Gastronomia eta folklorea elkartuta, bihar
Atsegindegin jarri dute zita bihar, 10:00etatik aurrera. Postuak jarriko dituzte, bertako gastronomiarekin eta informazio turistikoarekin. Pintxoak eta ardoa ere izango dira aukeran.
Egun osoan egongo dira bertan, eta ondo girotuta, gainera. Musikak ez du etenik izango, Extremadurako jotekin eta kantu tipikoekin, eta dantza ere ez da faltako: bi emanaldi eskainiko ditu Virgen de Guadalupe talde folklorikoak. 13:00etan izango da aurrenekoa, eta 18:00etan bigarrena.