Azken urteetan egin bezala, Atsolorra egingo dute bihar Ereñotzun. Auzo Udalak eta 2014an jaiotako haurren gurasoek antolatu dute. Iaz Ereñotzun jaiotako umeei ongi-etorria emango diete ekitaldi honetan. Ereñotzuk, gutxi gorabehera, 630 biztanle ditu eta horietako 10 inguru, iaz jaiotakoak dira. Arratsaldeko 17:30etan izango da, Auzo Etxean.
Antzinako ohitura berreskuratu
Auzo Udalaren nahia da galtzear edo alboratu samarrak egon diren ohitura batzuk indartzea; hala nola, auzolana.
Zentzu horretan, komunitatean bizimodua egitearekin lotura duen ohitura bat berreskuratu nahi izan du: Atsolorra, hau da, auzoan haur bat jaiotakoan, amari eta jaio berriari egiten zitzaien bisita. Ospakizuna merienda bat izaten zen eta menu berezia izaten zuen (gisaua, txokolate beroa, arroz-esnea...). Baserri bakoitzeko, etxekoandrea edo adin gehieneko emakumea joan ohi zen etxeko ordezkari gisa. Opariak eramaten zituzten bakoitzak ahal zuen neurrian etxekoei emateko. «Baina auzoko emakumeentzat ere, egun haundia izaten zen, edadeko emakumeentzat festa bakarra ia. Istorioek parranda giroa eta pasarte umoretsuak jasotzen dituzte», azaldu dute.
Udaberriro, denak batera
Ohituraren arabera, ospakizun edo erritual hau haur jaio berri bakoitzeko egin izan da bakoitzaren etxean. Dena dela, oraingoan eta hemendik aurrera, udaberriro aurreko urteko jaiotza guztiak batera ospatzeko Atsolorra egiteko asmoa dago, Ereñotzuko Auzo Etxean. «Atsolorra bere garaian auzotar askok eta askok ezagutu dute, baina belaunaldi gazteenek ez, batzuk zer den ere arrastorik ez dute», azpimarratu dute.
Eta gaineratu: «Gure herriaren ondare den usadio honek jai izaeraz gain, baditu beste dohain batzuk auzoaren izaera indartzeko: onespen soziala, elkar babesteko eta laguntzeko konpromisoa... Asmo horiek guztiak gauzatu nahi dira».
Urtetik urtera, ezagunagoa
Duela hiru urte antolatu zuen Atsolorra Auzo Udalak eta ordutik ezagunagoa egiten ari da urtetik urtera. Gainera, Orduñan eta Oiartzunen ere ospatu da, gutxienez, ordutik.
Bestalde, Atsolorrei buruzko istorio, bitxikeri, argazki eta abar jasotzeko asmoa ere badute eta auzotarrei dei egiten diete zerbait izanez gero, antolatzaileei jakinarazteko