Maiatzeko Udal Hauteskundeetan izango da Orain Hernani taldea ere, behar zituen 500 sinadurak bilduta: «poz haundiz adierazi nahi dugu, jaso ditugula taldearen legalizazioa bermatzeko behar genituen sinadurak», azaldu dute.
Horregatik, eskerrak eman dizkiete herritarrei, «gugan jarritako konfiantzagatik. 15 egun eskasetan 600 firmatik gora jasota, hernaniarrek aukera bat gehiago izango dute, talde elektoral berri bat daukagu. Eta hori, sinadurekin lagundu dutenen ekarpenari esker izan da. Honakoa hasiera besterik ez da, eta herriarentzat lanean jarraituko dugu».
Udaletxeko eta Biteriko langileei ere, eskerrak
Modu berean, Orain Hernaniko kideek eskerrak eman nahi dizkiete udaletxeko eta Biteriko langileei: «eman diguten tratua ezinhobea izan da beti, eta bereziki firmak biltzeko prozesuan».
Taldeak azaldu du, ahalegin haundiak egin behar izan dituela, hauteskundeetan egoteko: «araudiak gure esfortzuak biderkatzera eraman gaitu, sinadurak aurkezten genituen bitartean, hautagaien zerrenda aurkeztu behar genuelarik».
Programa osatzeko lanean
Sinadurak bilduta, programa osatzeko lanean ari dira orain: «jo eta ke ariko gara horretan orain, eta horretarako, zuen proposamenak behar ditugu».
Hautagai zerrenda ere, laster aterako ditu argitara Orain Hernanik, aurkezpen ofizialean. Atzoko Kronikan zehaztu bezala, Jaione Aristregui Cao azaltzen da zerrendaburu gisa, Gipuzkoako Aldizkari Ofizialean.