Bigarrenez, Udaberri Festa antolatu du Hernaniko Gure Esku Dagok, Ave Maria parkean. Igande honetan izango da, goizeko 11:00etatik arratsaldeko 17:00etara. Ehuntze Eguna izango da igandekoa, «erabakia ehuntzen jarraitzeko eguna», hain zuzen ere.
Zazpi gune jarriko dituzte, parkearen luze zabalean: gune nagusia egongo da zentroan, eta horren inguruan egongo dira txosna eta oholtza, arte gunea, musika gunea, dantza gunea, umeen gunea eta abentura gunea.
Ur txirristra ere izango da, gune nagusiaren ondoan, eta eskulanak egiteko aukera izango dute haurrek, umeen gunean.
Nazioarteko pintxopotea, martxan jartzeko
Goizeko 11:00etan jarriko dituzte zazpi guneak martxan, eta orduan hasiko dira oihalak osatzen, gero hernaniarren oihal erraldoia egiteko. Festari hasiera emateko, gainera, nazioarteko pintxopotea ere izango da.
Ondoren, kirol jarduerak izango dira gune nagusian, 11:30etatik 12:30etara.
Ekitaldi nagusia, 12:30etan
Eguerdian egingo dute ekitaldi nagusia, 12:30etan. Osatutako oihalarekin, kalejira egingo dute aurrena, eta hautestontzia ere eraikiko dute. Ondoren, Eskuetan flash moba grabatuko dute.
Bazkalordua iristean, berriz, picnic herrikoi musikatua izango da, bakoitzak etxetik eramandakoarekin.
17:00etan itxiko dute txosna, eta Festari bukaera eman.