Hautagaitza aurkeztu du Hernaniko EAJk, Andoni Amonarraiz buru dela, maiatzeko Udal eta Foru Hauteskundeetarako: Amonarraiz bera, Javier Sagastigoitia, Felix Etxeberria, Ana Azpiazu, Mikel Gurutzeaga, Maria José Martínez, Andoni Gortazar, Maria Otaegi, Jose Antonio Cuesta, Isabel Zubillaga, Iñaki Arratibel, José Antonio Recondo, Pilar Ugalde, Andoni Gortazar, Txomin Gainza, Conchi Azkue eta Felipe Etxeberria.
«Lan talde honen ezaugarri nagusia esperientzia da, eta ilusio ikaragarria daukagu Hernaniren alde egiteko. Aurrerapauso bat eman dugu, uste dugulako gure herria honako hiru kontzeptuetara gidatu behar dela: Gobernu ona, Hernani hernaniar guztiontzat, eta Zure esku dago», azaldu dute.
«Garaia da alkatetza egoteko ezberdina errespetatzen duen indar integratzaile baten esku»
«Ez gara sektarismoetan eroriko, ezker abertzalea bezala»
Proposatu duten zerrendak, «kudeaketa eraginkorragoa» bermatuko duela ziurtatu dute. Izan ere, hernaniar guztientzat lan egiteko konpromisoa hartu du alderdi jeltzaleak: «herritar guztientzat gobernatuko dugu, eta ez gara sektarismoetan eroriko, ezta lagun arteko politika egiteko moduetan ere, ezker abertzalea bezala. Garaia da alkatetza egon dadin ezberdina errespetatzen duen indar abertzale eta integratzaile baten esku», azaldu du Amonarraizek.
Horregatik, «Hernani integratzaile» baten alde egin du EAJk: «herritarren arteko errespetua bermatuko duen udalerria eta guztientzat irekia izango dena».
Amonarraizek kritikatu du, ezker abertzalearen politika egiteko modua: «bere militanteentzat soilik gobernatzen dute, Parte hartzeaz hitz egiten dute, baina gero ez dute aplikatzen. Gainera, euren ideologiarekin bat ez datozen intereseko proiektu guztiak baztertzen dituzte. Hernani ezker abertzalea baino askoz gehiago da».