Gipuzkoako Sagardogileen Elkarteak azaldu duenez, euskal sagardoak geroz eta interes haundiagoa pizten du Ameriketako Estatu Batuetan. Astigarragako Petritegi sagardotegiak bere sagardoa aurkeztu zuen New Yorken, martxoaren 29an, eta bihar, Bostonen izango da.
New Yorkekoa, Txikito jatetxean izan zen Euskal Sagardotegia ekimenaren barruan. Song of the Basques (Euskaldunen kanta) dokumentala ere aurkeztu zuten, Emily Lobsenz zinegile estatubatuarrarena.
Biharko ekitaldia, berriz, Bostoneko Toro jatetxean izango da. Bostoneko txotx irekiera egingo dute eta dokumentala ere aurkeztuko dute, 22:00etatik aurrera. Petritegiko Ainara Otañok hartuko du parte.
Urteak, esportazioarekin
Elkartetik nabarmendu dute, Petritegi sagardotegiak urteak daramazkiela kalitatezko sagardoa sustatu eta esportazioan lan egiten. «AEBetara geroz eta sagardo gehiago eramaten dute. Sagardoa izugarrizko zabalkundea ari da izaten azken urteetan, modan jartzeraino, eta euskal sagardoak bere lekua izan nahi du. Horrek ahalegin berezia eskatzen die Euskal Herriko sagardotegiei, banatzaileak bilatzeaz gain, produktuak ezagutu eta baloratzeko ekitaldiak egitea ezinbestekoa baita».
Bereziartua, Irigoien eta Astarbe, sarituak
Euskal sagardoa nazioartean indartzen ari dela argi era-kusten dute azken asteetan elkarteko eta Astigarragako hainbat sagardotegik lortutako sariek. Bereziartuak Urrezko Domina lortu zuen Laku Handietako Nazioarteko Sagardo Lehiaketan, Michiganen (AEB), eta Irigoien-Herrerok zilarrezkoa lortu zuen.
Eta ez hori bakarrik, Nazioarteko Apfelwein Weltweit Sagardo Feria izan da Frankfurten (Alemania) eta Bereziartuak eta Astarbek sari bana lortu zuten.