Gaurtik ostegunera, aukera izango da Biterin Herri Indigenen eta enpresa multinazionalen arteko gatazka ezagutzeko. Hiru eguneko jardunaldiak antolatu dituzte, Mugarik Gabe Gobernuz Kanpoko Erakundeak eta Hernaniko Kooperazio Taldeak: Eutsi edo hil, Herri Indigenak enpresen neokolonialismoaren aurrean.
‘El oro o la vida’ dokumentala, hasteko
Arratsaldeko 19:00etan hasiko dira saio guztiak, eta gaurkoan, dokumental batekin emango zaie hasiera jardunaldiei: El oro o la vida. La recolonización y resistencia en CA, Guatemalan egindakoa. Gaztelaniaz izango da, eta 57 minutu irauten ditu.
Dokumentala bukatuta, solaserako tartea izango da. Aurkezpen bat egingo du Latinoamerikako Multinazionalen Behatokia, Bakea eta Duintasuna Elkarteak, gaztelaniaz: Latinoamerikan Enpresa Transnazionalen Jardueraren kontestua, eragina eta kasu desberdinak. Horri buruzko solasaldia egingo dute ondoren.