Jarri diote data, Astigarragako Kultur Etxe berriari. 2017an hasiko dira eraikitzen, bigarren seihilekoan, eta bi urtetan aurreikusten dute obrak bukatzea, 2019ko bigarren erdirako.
Hala adostu dute Udalak eta Urumea Berriko proiektuaren promotorak. Izan ere, Kultur Etxe berria egitea proiektuaren barnean zegoen, eta promotorak berak hartu behar du bere gain obra, proiektuaren karga urbanistiko gisa. Kontua da, hitzarmena sinatu zutenean data zehatzik ez zutela jarri, eta orain negoziatu dituzte eraikina egiteko epeak.
2020 urterako, Kultur Etxe berria, ondoko plaza eta ibai bazterreko parkea eginda egongo dira, Urumea Berrin.
Kultur Etxe berria, plaza bat eta parkea, 2020rako
Urumea Berrin eraikiko da Kultur Etxe berria, Ibai Ondo etxearen ondoan. Gainera, plaza bat ere egingo dute, eraikin berriaren ondoan. 2018 urteko bigarren erdian hasiko dira hori eraikitzen, eta Kultur Etxearekin batera bukatuko dute, 2019 urteko bigarren seihilekoan.
Beste obra bati ere jarri diote fetxa, Udalak eta Urumea Berriko promotorak. Ibai bazterreko parkea egingo dute, 2017ko bigarren erdian hasita. Parkea bukatuta egongo da 2019ko aurreneko seihilekoan.
Etxebizitza gehiago egiteko asmoa du promotorak aurten, eta horietako 6 babes ofizialekoak izango dira, alokairukoak.
Beste eraikin bat egiteko asmoa, promotorak
Datak negoziatzeko abiapuntua izan da, Urumea Berriko promotorak erakutsi duen asmoa, etxebizitza berriak egiteko. Aurten egin nahi du eraikin berri bat promotorak, eta horrekin lotuta, Andoni Gartzia alkatea eta enpresa negoziatzeko bildu dira, karga urbanistiko horien egutegia ixteko: Kultur Etxea, plaza eta ibai bazterreko parkea.
«Emaitzak positiboak izan dira», jakinarazi du Udalak, «eta 2020rako Urumea Berriko ingurune guztia bukatua egongo da».
Promotorarekin lortutako akordioa, Tokiko Gobernu Batzordeak berretsi zuen, egindako azkeneko bileran.
Babes ofizialeko 6 etxebizitza berri
Bestalde, promotorak aurten Urumea Berrin egingo duen eraikin berrian, 400 metro karratuko lokal bat jasoko du Astigarragako Udalak, eta baita 6 etxebizitza berri ere.
Babes ofizialeko etxebizitzak izango dira horiek, eta alokairu sozialeko erregimenean banatuko ditu Udalak.