Aurrekontu partehartzaileen aldeko apustua egin da aurten ere Hernaniko udaletxean. 2014an herritarrek erabakitako proposamenak 2015eko aurrekontuetan txertatu ziren eta proiektu batzuk egin dira dagoeneko: edukiontzi gehiago jarri, banko gehiago eta altuera haundiagoan jarri, irisgarritasuna hobetu hainbat gunetan, Zinkoeneatik Floridarako bidean argiak jarri... Plaza Berriko lurra aldatzen datorren astean hasiko dira, eta bestelako proposamen batzuk betetzeko lanean ari dira: parke bat estaltzea, komon publikoa jartzea, dirulaguntzak sortzea arlo batzuetan...
Aurten, beste 500.000 eurorekin zer egin daitekeen proposatu eta erabaki ahal izango dute hernaniarrek, apirilaren 30era arte. 2016ko aurrekontuan sartuko dira.
Hiru modu iritzia emateko
Proposamenak egiteko hiru bide izango dira: gaikako saioetan parte hartuta (apirilaren 21, 23, 27 eta 29an); proposamenak buzoietan utziz (Biterin, udaletxean, kiroldegian, Goiz Eguzkin edota Institutuan); edo www.hernani.eus webgunean.
Diputaziorako ere jasoko dira proposamenak
Gipuzkoako Foru Aldundiak ere partehartze prozesua jarri du martxan hurrengo 4 urtetako aurrekontuetarako proposamenak biltzeko. Hernanin ez da bilerarik egingo, eta Hernaniko prozesuan biltzen diren Diputazioaren eskumeneko proposamenak hara bideratuko dira.
PROPOSAMENAK EGITEKO SAIOAK:
Apirilak 21, 19:00etan Biterin:
Jarduera fisikoa eta kirola, Lurralde antolaketa eta hirigintza, Etxebizitza politika, Mugikortasuna eta Aniztasun funtzionala.
Apirilak 23, 18:00etan Biterin:
Kultura, Hezkuntza, Hizkuntza, Gazteria eta 3garren adina.
Apirilak 27, 19:00etan Gabriel Zelaian:
Tokiko garapena, Ingurumena eta natur baliabideak, Hondakinak, Energia, Merkataritza, Turismoa, eta Lan eta enplegu eremua.
Apirilak 29, 18:00etan Plaza Feministan:
Parekidetasuna, Kultur Aniztasuna, Lankidetza eta internazionalismoa eta Gizarte politika.