Gogor kritikatu du Parte Hartze Ordenantza berria, Astigarragako Hamaikabatek. Martxoko Plenoan onartu zuen Udalak, eta kontra bozkatu zuen alderdiak: «ordenantza Hauteskundeen bezperatan ateratzeak erakusten du, Bilduk legegintzaldi honetan sustatu duen parte hartzea», salatu dute Bixente Arrizabalaga eta Imanol Lizarralde H1!eko zinegotziek.
«Azken lau urteotan, parte hartze izpirik ere ez da egon Astigarragan, eta Udalak ez du inongo lotsarik izan herritarren eskaerei kasurik ez egiteko. Horregatik, ez dugu engainu baten konplize izan nahi», argudiatu du Hamaikabatek, ordenantzaren kontrako botoa.
«Udalak ez du lotsarik izan herritarren eskaerei kasurik ez egiteko».
«Autokritika falta nabarmena erakusten du Ordenantzak»
Hamaikabaten ustez, «autokritika falta nabarmena» erakusten du Ordenantzak: «esaten du, parte hartzearen oinarrizko nibelak lortu nahi dituela Udalak. Baina nibel horiek ez dira eman lau urte hauetan, beraiek gobernuan egon arren».
Plenoen ordutegia ere jarri du mahai gainean Hamaikabatek: «arratsaldera pasa zituzten, herritar gehiago etortzeko. Baina egiaz, jende gutxiago hurbildu da, legegintzaldi honetan. Udalak egin behar duena da, parte hartze hori sustatu eta horretarako bideak eskaini».
«Autobonborako tresna bat bihurtu nahi dute parte hartzea»
Bestalde, H1!ek defendatu du, parte hartze prozesuak enpresa baten bitartez egitea, politikariak bigarren planoan geratuz: «baina aukera hori baztertu du Bilduk, eta parte hartzea politikarien autobonborako tresna bihurtu nahi dute».
Ordenantzak muga gehiegi jartzen dituela ere kritikatu dute: «alkateak hilean 8 ordu eskainiko ditu herritarrekin harremanetan egoteko, baina gure ustez, uneoro egon behar du haien esanetara. Bestalde, Ordenantzak dio gehienez ere bi kontsulta egin ahal izango direla urtean. Horrek zer esan nahi du, gai oso garrantzitsu bat eduki arren, kuota gainditu bada ezingo dela kontsultatu? Folklore politiko modu bat ematen dute kontsultek».