Guraso eta hezitzaileek urtetan aldarrikatu dute Haur Eskolarako espazio gehiagoren beharra. Azpiegitura eta Zerbitzuen inguruko partehartze prozesuan gaia aztertu zen, eta Gobernu Taldeak lokal berri bat alokatu du, arazoari konponbidea emate aldera.
Lokal berria Nabarra Oinatz kalean dago, 3 eta 5 zenbakien artean; Haur Eskolaren jatorrizko lokaletik 25 metrora.
Hiru urterako alokairua, erosketarako aukerarekin
Astigarragako Udalak 3 urterako alokairu kontratua sinatu du, eta hilero 800 euro ordainduko ditu.
Hiru urte horiek pasatzean, ordea, lokala erosteko aukera izango du, 215.561 eurotan. Erosketa egiterakoan, prezio horri alokairuko 3 urteetan ordaindutako kopurua kenduko litzaioke. Udalak lokala erosteko asmo sendoa azaldu du.
Martxan, irailetik aurrera
Orain lokal berria egokitzeko lanak hasiko dituzte, umeak bertan egon ahal izateko.
Lan horiek irailerako bukatzea espero da, eta, horrela, ikasturte berrirako Haur Eskolak bi lokal izatea aurreikusten da; gaur egungoa eta lokal berria.
Etorkizunean, Urumea Berrira
Hala ere, hau ez da izango Haur Eskolaren kokapen definitiboa. Alokairu kontratuaren 3 urteak pasatzen direnerako, Udalak espero du Haur Eskola lekuz aldatzea. Horretarako, Urumea Berrin 800 m2-ko lokal berri bat eskuratuko du, promotorak urbanizazioarekin aurrera egin ahala entregatuko duena.
Horrela, egungo Haur Eskolako lokala eta orain alokatu dena libre geratuko dira. Bertan, 0-3 urte bitarteko umeentzako ludoteka jartzeko aukera aztertzen ari da Udala.