ASTIGARTARREK erabaki dute zertara bideratu 2015eko Udal Aurrekontuko 100.000 euroak. Prozesu partehartzailea jarri du martxan Udalak, eta galdeketa egin ostean, badute erantzuna: ikastolako aterpea zabaltzea erabaki dute herritarrek.
Guztira 375 herritar gerturatu dira iritzia ematera, eta horietatik 97k egin dute ikastolako aterpea zabaltzearen alde: %26ak. Udalak gogoratu du, joan den urtean ere aterpea eraikitzearen aldekoak izan zirela bozka gehienak: «orain Udalak lanean hasi beharko du herritarren eskaera betetzeko».
Bestalde, azpimarratu dute aurtengo galdeketa joan den urtekoa baino banatuagoa izan dela: «aterpeak jaso du bozka gehien, %26. Ondoren etorri dira: Kiroldegia, asfaltatzeak, Sagardo plaza, multikirol eremua eta obra txikien multzoa...
Erronka, hurrengo urtean herritar gehiago gerturatzea
Datorren urtera begira, helburua herritar gehiago gerturatzea dela azaldu du Udalak: «tresna eta bide ezberdinak uztartuko ditugu, helburua baita ahalik eta parte hartzaileena izatea. Dena den, eskerrak eman nahi dizkiegu parte hartu duten guztiei, bai proiektuak proposatu zituztenei, eta baita bozka eman dutenei ere».
Proiektuak eta bozkak
Asfaltatzeak: 46 bozka, %12
Kiroldegia: 51 bozka, %14
Sagardo plaza: 45 bozka, %12
Multikirol eremua: 44 bozka, %12
Ikastolako aterpea: 97 bozka, %26
Jolas parkeak berritu: 17 bozka, %5
Anuska: 26 bozka, %7
Aktuazio txikien multzoa: 45 bozka, %12